काठमाडौं । स्थानीय तह निर्वाचनबारे छलफल गनर्र सत्ता गठबन्धनको बैठक बस्ने भएको छ । बिहीबार बिहान साढे १० बजे प्रधानमन्त्रीको सरकारी निवास बालुवाटारमा बैठक बोलाईएको छ ।
नेपाली काँग्रेसका वरिष्ठ नेता रामचन्द्र पौडेलका अनुसार बैठकमा स्थानीय तह निर्वाचनबारे चुनावमा कसरी अघि बढ्ने भन्नेमै छलफल केन्द्रीत हुनेछ । वैशाख ३० गते एकै पटक देशभरका ७५३ वटा स्थानीय तहमा निर्वाचन हुँदैछ ।
निर्वाचनमा ५ दलीय सत्ता साझेदार गरिरहेका दलहरु स्थानीय तहमा पनि तालमेल गरेर जाने तयारीमा छन् । हाल प्रमुख प्रतिपक्षका रुपमा रहेको दल नेकपा एमालेले भने एक्लै चुनाव लड्ने बताएको छ ।
सत्ता साझेदारी गरिरहेका नेपाली काँग्रेस, नेकपा माओवादी केन्द्र, नेकपा एकीकृत समाजवादी, जसपा र जनमोर्चाले स्थानीय तहमा तालमेल गरेर जाने निर्णय गरिसकेका छन् । उनीहरुले महानगर र उपमहानगरको हकमा केन्द्रबाटै निर्णय गर्ने तयारी गरेका छन् ।
नेकपा माओवादी केन्द्रका अध्यक्ष पुष्पकमल दाहाल प्रचण्डले बुधबार चितवन पुगेर गठबन्धनको बैठकले महानगरपालिका स्तरमा हुने तालमेलबारे छलफल गरेर निर्णय प्रक्रियामा पुगिने बताएका छन् । प्रचण्डले भोलिको बैठकमा महानगरमा पनि तालमेलको बारेमा छलफल हुने र बैठकमा भरतपुरको मेयरमा माओवादीको दावी रहने बताएका छन् ।
त्यस्तै काँग्रेस नेता रामचन्द्र पौडेलले भने महानगरमा हुने तालमेलबारे भोलि नै निर्णयमा पुग्न सकिने सम्भावना कम रहेको बताएका छन् । पौडेलले पहिला सबै दलको रिपोर्टिङ के कस्तो छ ? त्यो थाहा पाएपछि कहाँ कुन दलले उम्मेदवारी दिने भन्ने निर्णयमा पुगिने बताएका हुन् ।
हाल भरतपुर महानगरपालिकामा नेकपा माओबादीबाट प्रचण्ड पुत्री रेणु दाहाल मेयर पदमा रहेकि छन् ।
