काठमाडाैं । राप्रपालाई असफल हुने छुट नभएको अध्यक्ष राजेन्द्र लिङ्देनले बताएका छन् । लिङ्देनले अन्य राजनीतिक दललाई असफल हुने छुट भएपनि राप्रपालाई छुट नभएको राप्रपा मकवानपुरद्वारा हेटौंडामा आयोजना गरेको आमसभालाई सम्बोधन गर्दै बताएका हुन् ।
देश गम्भिर आर्थिक चपेटामा परेको बेला सत्तामा रहेका राजनीतिक दल भने देशलाई संकटबाट जोगाउन कुनै योजना नबनाएको आरोप पनि लिङ्देनले लगाएका छन् । पटक पटकको आन्दोलन तथा झुटा भाषणबाट व्यवस्था परिवर्तन भयो तर नेपाली जनताको अवस्था परिवर्तन भएन भने हाल देश सीमित राजनीतिक दलको बन्धक भएको छ ।
अहिलेका ठूला भनिएका दलका लुट्न नसकेका कार्यकर्ता खुसी छैनन् भने भ्रष्टाचारबाट कमाएको पैसा भ्रष्ट नेताको घरमा छ । उनले विदेशबाट लिइएको ऋण हाल देश बनाउने काममा प्रयोग नभई अनुत्पादक क्षेत्रमा खर्च गरिएको उनको आरोप राजनितिक दल एवम नेताहरुलाई लगाएका छन् ।
सीमित नेताहरुले गर्दा देश बेरोजगार उत्पादन गर्ने कारखानामा परिवर्तन भएको उनले आरोप लगाए । देशको कुनै पनि वर्ग खुशी नभएको बताउँदै लिङ्देनले देशका पचासौं लाख युवा वैदेशिक रोजगारमा जानु दुखदायी भएको बताए ।
