रामेछाप । नेकपा एमाले रामेछापको पार्टी कार्यालय (मदन आश्रित) भवनको शिलान्यास गरिएको छ । आज ३० औँ मदन आश्रित दिवसको अवसर पारेर आयोजीत एक कार्यक्रममा पार्टीका केन्द्रीय उपमहासचिव विष्णु रिमालले मन्थलीस्थित आकाशेमा रहेको भवनको शिलान्यास गरेका हुन् ।
लामो समयदेखि भाडाको घरबाट सञ्चालन हुँदै आएको एमालेले भवन निर्माणको थालनी गरेको हो । पार्टी नेता समेत रहेका रत्न कँडेलको अध्यक्षतामा गठित समिति मार्फत निर्माण हुन लागेको उक्त भवनको लागत स्टिमेट अनुसार आगामी दुई वर्षमा सम्पन्न गर्ने योजना रहेको छ । पाँच करोड ३० लाख लागतमा बन्ने उक्त भवन निर्माणको लागि जिल्लाका ‘दोरम्बा शैलुङ गाउँपालिका बाहेक अन्य स्थानीय तहले बजेट दिने भनेर मौखिक बचनबद्ध गरेको कँडेल बताउँछन् ।
प्रदेश सांसद समेत रहेका जिल्ला पार्टी अध्यक्ष आनन्द श्रेष्ठको अध्यक्षतामा सम्पन्न कार्यक्रममा पार्टी पोलिटब्युरो सदस्य कमल चौलागाँई, केन्द्रीय सदस्य कैलाश प्रसाद ढुङ्गेल, माधव ढुङ्गेल, गीता कार्की, प्रदेश कमिटी सदस्य तुलप्रसाद कँडेल, शान्तिप्रसाद पौडेल, रत्न गौतम, सांसद माया कार्की, प्रदेश कमिटी सदस्यहरू, जन वर्गीय सङ्गठनका नेता, कार्यकर्ता जिल्ला कमिटी उपाध्यक्ष, सचिव, उप–सचिव लगायतको उपस्थिति रहेको थियो ।
