काठमाडौं । कोशी प्रदेशका नेपाली कांग्रेसका १४ जिल्ला सभापतिहरुले ‘कोशी’ नाममा पुनर्विचार गर्न आग्रह गरेका छन्। नामाकरणको विषयलाई लिएर कोशी प्रदेशमा लगातार आन्दोलन भइरहेका बेला बेला सो प्रदेशका १४ जिल्ला सभापतिहरूले बुधबार संयुक्त विज्ञप्ति जारी गर्दै नामाकरणमाथि पुनर्विचार गर्न माग गरेका हुन्।
उनीहरूले नामाकरणमा पुनर्विचार गर्न प्रदेशसभासँग माग गरेका छन् । कांग्रेस सभापतिहरूले प्रदेशमा भइरहेको यो आन्दोलनको समाधान कांग्रेसकै नेतृत्वमा समाधान हुनुपर्ने भन्दै यो समस्या समाधानका लागि पहलकदमी लिन पार्टी नेतृत्वसँग आग्रह गरेका छन् । प्रदेशको नाम कोशी राखिपछि पहिचान पक्षधरले आन्दोलन गरिरहेका छन्।
“हामी कोशी प्रदेश नाम सम्बन्धमा पुनर्विचार गर्न पार्टी नेतृत्व तथा प्रदेश सभासँग विशेष आग्रह गर्दछौं,” विज्ञप्तिमा भनिएको छ, “अहिले प्रदेशमा भइरहेको आन्दोलन र कोशी नाम सम्बन्धमा पार्टीको प्रदेश तथा केन्द्रको नेतृत्वले साहसिक निर्णय लिनुपर्ने आवश्यकता हामीले देखेका छौं। कांग्रेसले मात्र संघीयताको मर्म र भावनालाई आत्मसात् गर्दै गल्ती कमजोरीहरूलाई सच्याउने साहस गर्न सक्दछ।”
उनीहरूले आन्दोलनमा भएको सरकारी दमनको भत्सर्ना पनि गरेका छन्। यससँगै संयमित हुन आन्दोलनकारीलाई पनि आग्रह गरेका छन्।
संघीयमन्त्रीसमेत रहेका मोरङ जिल्ला सभापति डिगबहादुर लिम्बु, खोटाङ सभापति विष्णु कुमार राई, उदयपुर सभापति हिमाल कार्की, झापाका सभापति देउ कुमार थेबे, संखुवासभाका सभापति दीपक खड्का, सुनसरी सभापति केदार भण्डारी र ओखलढुंगा सभापति तेजेन्द्र खनाल, सोलुखुम्बु सभापति नामगेल जाङ्बु शेर्पा, तेह्रथुम सभापति अर्जुन तुम्बाहाम्फे, इलाम सभापति डम्मर खड्का, पाँचथर सभापति रुपनारायण जगेबु, धनकुटा सभापति दिनेश राई, भोजपुर सभापति विनोद राई वान्तवा र ताप्लेजुङ सभापति गजेन्द्र तुम्याहाङले संयुक्त विज्ञप्ति जारी गरेका हुन् ।
२०७९ फागुन १७ गते बसेको प्रदेश सभा बैठकले प्रदेशको नाम कोशी राखेपछि पहिचान पक्षधर घटकहरूले चलाएको आन्दोलन अझै जारी छ । कोशी प्रदेश नामकरणको विरोधमा राजनीतिक दल र जातीय सङ्गठनहरू आन्दोलनमा उत्रिएका छन्।
यता, सरकारले भने प्रदेशको नामकरणपछि असन्तुष्टि जनाउँदै आन्दोलन गरिरहेका पहिचानवादीलाई वार्तामा आउन आह्वान गरेको छ । प्रदेश सरकारका प्रवक्ता उद्योग, कृषि तथा सहकारीमन्त्री तथा प्रवक्ता भक्ति सिटौलाले प्रेस विज्ञप्ति निकाल्दै आन्दोलनरत पक्षलाई वार्ताका लागि आह्वान गरेका हुन् । यसअघि सोमवार मुख्यमन्त्री हिक्मतकुमार कार्कीले गणतन्त्र दिवसको अवसरमा आयोजित कार्यक्रममा आन्दोलनरत पक्षलाई वार्तामा आउन आग्रह गरेका थिए।
नाम राख्दा निषेधाज्ञा
तीन वर्ष अघि २०७६ वैशाखमा विराटनगरलाई प्रदेशको राजधानी तोके पनि प्रदेशको नामबारे दलहरूबीच विवाद थियो।
भूगोलका आधारमा नाम राख्ने कि जातीय पहिचानलाई मान्ने भन्ने विवादले अघिल्लो पाँच वर्षे कार्यकालमा प्रदेशले नाम पाउन नसकेको हो।
कोशी प्रदेशको प्रदेश सभामा ९३ जना सांसद छन्।
