काठमाडौं । नेपाली कांग्रेसका सांसद दीपक गिरीले आफूलाई झोले सांसदको संज्ञा दिएका छन् । आइतबारको प्रतिनिधिसभा बैठकमा आगामी आर्थिक वर्षको बजेटमाथिको छलफलमा सहभागी हुँदै सांसद गिरीले सांसदबारे जनताले नबुझेकाले आफूलाई ‘झोले सांसद’ भन्न रुचाउने गरेको बताएका हुन् ।
उनले भने,’आफूलाई झोले सांसद भन्न रुचाउँछु । राति फोन आउँछ एउटा बुढीआमाको– बाबु, मेरो त एउटा खसी मर्यो नि, दुईटा खसी पालेको सांसद बाबुले केही गरिदिनुहुन्छ कि ! यस्तो छ नागरिकको बुझाइ । जनतालाई सांसदले ऐन बनाउने हो भन्ने थाहा छैन । पहिरो गयो माननीयज्यू, आगलागी भयो माननीयज्यू ।’
सांसद गिरील बजेट परम्परागत शैलीमा चलेका कारण समस्या आएको बताए । उनले प्रतिपक्षीले विरोध गर्नैपर्ने र सत्तापक्षले समर्थन गर्नैपर्ने अवस्थाको अन्त्य गर्नुपर्ने बताए ।
उनले सांसदलाई वडाध्यक्षको स्तरमा दाँजेको भन्दै काठमाडौं महानगरपालिकाका मेयर बालेन साहलाई धन्यवाद समेत दिए । उनले भने,’म त सलाम गर्छु बालेनजीलाई । उहाँले हामी झोलेलाई वडाध्यक्षको स्तरमा पुर्याइदिनुभयो । अब त चिन्न छोड्नुभयो होला भन्ने फोन आउँछ । जनताको स्तर यस्तो छ ।’
सरकारमा भएकाहरूले शीर्ष नेताको क्षेत्रमा बढी बजेट राख्ने गरिएको भन्दै उनले आपत्ति जनाए । उनले भने,’बजेटको इतिहास हेर्दा माननीय विष्णु पौडलको पालामा रुपन्देहीमा बढी जानुपर्ने । कपिलवस्तुको एमालेकै सांसद भए पनि दुःख पोख्नु पर्ने । जनार्दन शर्माले भाषण गर्दा त्यता ढल्कने । हालको गठबन्धनको ठूलै नेताले यस्तो भयो भनेको सुनिएको के हो ?’
