काठमाडौं । नेपाली कांग्रेसका महामन्त्री गगनकुमार थापाले चुनावमा टिकट वितरण प्रणालीलाई नसुधारे पार्टीभित्र अहिलेको बेथिती कायमै रहने बताएका छन् ।
शनिबार काठमाडौंमा नेपाली कांग्रेस दोलखा काठमाडौं सम्पर्क समितिको पहिलो अधिवेशनलाई सम्बोधन गर्दैै महामन्त्री थापाले आफू बदलिएर देश बदल्ने अभियानमा कांग्रेस जुटनुपर्ने बताएका हुन् ।
कांग्रेस बदल्नका लागि आफू महामन्त्री पद त्याग गर्न पनि तयार रहेको बताए । दाग लागेको पार्टीको महामन्त्री बन्नुभन्दा सफा कांग्रेसको कार्यकर्ता भएर बस्न आफूलाई मन भएको उनको भनाई थियो उनले पार्टीभित्र सुधारका लागि चुनावमा टिकट दिने अधिकार तल्ला कमिटीमा लैजानुपर्ने बताए ।
उनले तल्ला कमिटीलाई टिकट दिने अधिकार दिँदा दाइले भाउजु छान्न नपाउने बताए । उनले भने, ‘पार्टीमा दाइलाई टिकट दिने अधिकार दिएपछि दाइले भाउजु नै छान्ने हो । दाइ कहिले म होला कहिले अर्को होला तर जसलाई दिए पनि दाइले भाउजुलाई नै टिकट दिने हो । त्यसैले टिकट दिने अधिकार सक्दो हामीले तल्ला कमिटीमा लैजानु पर्छ।’
उनले अबको नीति महाधिवेशनले विधिको शासनमा सम्झौता हुन्छ भने त्यसलाई मानेर सरकारमा जाँदैन भनेर लेख्नुपर्ने बताए ।
