काठमाडौं । नेपाली कांग्रेसका महामन्त्री गगन थापाले सहकारी पीडितहरूको रकम यथाशिघ्र फिर्ता गर्न माग गरेका छन् । आइतबारको प्रतिनिधिसभा बैठकमा महामन्त्री थापाले पीडितहरूको रोकिएको रकम फिर्ता गर्न सरकार जिम्मेवार हुनुपर्ने बताएका हुन् ।
उनले सहकारी सुधारका गठित कार्यदलले प्रतिवेदन बुझाइसकेको र सोही प्रतिवदेनअनुसार आजैबाट पीडितहरूलाई रकम फिर्ता हुनुपर्ने बताए ।
उनले भने,’सरकारले सहकारी सुधारका लागि वैशाख २६ गते अध्ययन कार्यदल गठन गरेको थियो। यो अध्ययन कार्यदलले २७ बुँदामा प्रतिवेदन बुझाइसकेको छ। यो प्रतिवेदनमा धेरै कुरा समेटिएका छन् । बचतकर्ता जसको रकम रोकिएको छ। फिर्ता गराउनका लागि आजैबाट प्रारम्भ गरियोस्। हामी अब सहकारी पीडितको समाचार होइन,न्याय पाएको समाचार सुन्न चाहन्छौं।’
महामन्त्री थापाले सहकारी पीडितको आवाज राज्यले सुन्नैपर्ने बताए।
