कोही बा हुनुहुन्छ
कोही बाहरू पनि हुनुहुन्छ
कोही बा साँच्चिकैका बा हुनुहुन्छ
कोही बा ठूलाबा र सानाबा पनि हुनुहुन्छ
कोही बाहरु आफूलाई बा भन भन्नुहुन्छ
कोही बाहरु आफूलाई बा भनाइमाग्नुहुन्छ
कोही बाहरु आफूलाई बा भनिदेओस् चाहनुहुन्छ ।
कोही साँच्चिकैका बा गुमनाम हुनुहुन्छ
कोही बनेका र बनाइएका बाहरु मात्र मालामाल हुनुहुन्छ
कोही लोकल बाहरु हुनुहुन्छ अनि कोही राष्ट्रिय बाहरु
कोही बाहरु आफूलाई सबैका बा भन्ठान्नुहुन्छ
कोही बाहरु छोरीका लागि मात्र बा बन्नुहुन्छ
कोही बाहरु छोराका लागि मात्र बा बन्नुहुन्छ
कोही बाहरु जोइका पोइ मात्र हुनुहुन्छ ।
कोही बा सन्तान जन्माउनुहुन्छ
कोही बाहरु सन्तान बनाउनुहुन्छ
कोही बा सन्तानको भविष्यबारे चिन्ता गर्नुहुन्छ
कोही बा आफ्नो हाड घोट्नुहुन्छ पसिना पोख्नुहुन्छ
कोही बाहरु आफ्नो भविष्यबारे चिन्ता गर्नुहुन्छ
कोही बाहरु सन्तानको हाड घोट्नुहुन्छ पसिना चुस्नुहुन्छ
कोही बाहरु आफू अघाएर अरूमा मुस्कान खोज्नुहुन्छ ।
कोही बाहरुका जोईका बारे बोल्न हुँदैन
कोही त बाहरुकै बारेमा बोल्न हुँदैन
कोही बाहरुका छोरीका बारे झन् बोल्नै पो हुँदैन
कोही बाहरुका बारे बोले देश डुब्छ रे
कोही बाहरुका जोईबारे बोले पानी सुक्छ रे
कोही बाहरुका छोरीको बारे बोले झन् न्याय लुक्छ रे ।
कोही बाहरु कहिले भान्से हुन्छन्
कोही बाहरु अर्को चोटि भान्से हुन्छन्
कोही बाहरु तर खान्छन् र गुदी खान्छन्
कोही बाहरु चोक्टा खान्छन् सुतीसुती खान्छन्
कोही बाहरुका केटाकेटी अलिअलि झोल भेट्छन्
कोही बाहरुका केटाकेटी हाड चुस्छन् तृप्त हुन्छन्
कोही बाहरुका केटाकेटी गुन्द्रीको चिनी टिप्छन्
कोही बाहरु डकार्छन्, केटाकेटी अघायौँ भन्छन्
कोही बाहरु हावा छोड्छन्, केटाकेटी बसायो भन्छन् ।
कोही बाहरु अघाए सबैको पेट भरिनुपर्ने
कोही बाहरु निदाए सबैको थकान मेटिनुपर्ने
कोही बाहरु हिँडे सबै गन्तव्यमा पुगिने
कोही बाहरुका व्युत्पाते सन्तानको भलो होस्
कोही बाहरुका व्युत्पाते सारथीकाे जय होस्
कोही बाहरुका व्युत्पाते झुण्डकाे मंगल होस्
कोही साच्चिकैका बाको जे होस् जसो होस्
कोही बनाइएका बाहरुको मात्रै शुभहोस्
कोही बाहरूको मात्रै जय होस्, जय होस् ।।
- केशव अमोल
2080 पौष 5, मन्थली
