काठमाडौं । पारा पौडी खेलाडी भीमबहादुर कुमालले फ्रान्समा पेरिस पारा ओलम्पिक २०२४ का लागि हुने छनोट प्रतियोगिता खेल्ने भएका छन् ।
पेरिस पारा ओलम्पिक छनोट आधार रहेको सिटी विश्व पारा पौडी प्रतियोगितामा भीमले प्रतिस्पर्धा गर्न लागेका हुन् ।
सिंगापुरमा मे १७ देखि १९ सम्म हुने प्रतियोगितामा भीमले पुरुष ५० मिटर र १०० मिटर फ्रिस्टाइलमा नेपालको चुनौती प्रस्तुत गर्नेछन् ।
दुवै स्पर्धामा भीमकै नाममा राष्ट्रिय कीर्तिमान पनि छ । ५० मिटरमा ३३.३४ सेकेन्ड तथा १०० मिटरमा १ मिनेट २१ सेकेन्डको भीमको व्यक्तिगत उत्कृष्ट टाइमिङ नै राष्ट्रिय कीर्तिमान हो ।
सिंगापुरमा हुने प्रतियोगिताका लागि भीमले विगत २ महिनादेखि कालोपुलस्थित वेस्ट भेन्युमा नियमित प्रशिक्षण गरिरहेको नेपाल पारा पौडी संघका अध्यक्ष सरोज श्रेष्ठले जानकारी दिए । श्रेष्ठ पनि अफिसियलका रुपमा सिंगापुर जाँदैछन् ।
गोरखाको नारेश्वर बेनीखोला निवासी भीमले आफ्नो करियरमा ३ अन्तर्राष्ट्रिय प्रतियोगिता खेलेका छन् । उनले खेलेको पछिल्लो प्रतियोगिता चीनको हाङझाउमा भएको चौथो एसियाली पारा खेलकुद हो ।
त्यसअघि उनले सन् २०१८ मा इन्डोनेसियामा भएको तेस्रो एसियाली पारा खेलकुद तथा सन् २०१९ मा लन्डनमा भएको विश्व पारा पौडी प्रतियोगितामा नेपालको प्रतिनिधित्व गरेका थिए । ४१ वर्षीय कुमाल एम्पुटी फुटबलका पनि खेलाडी हुन् ।
भीमले पेरिस पारा ओलम्पिक छनोट हुने लक्ष्य रहेको बताउँदै भने, ‘एउटा खेलाडीको मुख्य उद्देश्य ओलम्पिक खेल्नु रहेको हुन्छ । यो एउटा सुनौलो अवसर हो । सक्दो प्रयास गर्नेछु ।’
टोलीलाई राष्ट्रिय खेलकुद परिषदका सदस्य सचिव टंकलाल घिसिङले शुक्रबार एक कार्यक्रमबीच बिदाइ गरे । भीम र अफिसियल श्रेष्ठ मे १५ मा सिंगापुर जानेछन् । प्रशिक्षक विजेनमान श्रेष्ठ आइतबार जाँदैछन् ।
सो अवसरमा सदस्य–सचिव घिसिङले पेरिस पारा ओलम्पिक छनोट हुने दोस्रो खेलाडी बन्न खेलाडीलाई शुभकामना दिए ।‘पेरिस पारा ओलम्पिकमा तेक्वान्दो खेलाडी पलेशा गोवद्र्धन छनोट भई इतिहास रचिसक्नु भएको छ । पलेशा पारा ओलम्पिकमा छनोट चरण पार गरी खेल्ने पहिलो नेपाली खेलाडी हुनुहुन्छ,’ सदस्य सचिव घिसिङले भने ‘अब पालो तपाईं (भीमबहादुर) को हो । राष्ट्रलाई सम्झेर उत्कृष्ट प्रदर्शन गर्नुहोस् ।
