रामेछाप । भिजिट भिसा भनेको आफ्नो देशबाट अर्को देशमा घुम्न जाने भिसा हो, यो निश्चित समयका लागि हुन्छ । त्यो निश्चित समय पुरा भएपछि घुमेर फर्कने हो । तर पछिल्लो समय युवाहरू भिजिट भिसामा वैदेशिक रोजगारीमा जाने क्रम एकदमै बढेको छ ।
कोरोना महामारीको असर गन्तव्य देशमा पर्दा कामको माग पनि कम आउनु र विभिन्न कारण यहाँ पनि श्रम स्वीकृति जारी नभएको अवस्थामा भिजिट भिसामा पठाउने क्रम बढेको देखिन्छ । युवाहरू वैदेशिक रोजगारीमा जान चाहने तर माग कम हुँदा उनीहरूलाई भिजिट भिसामा पठाएको देखिन्छ ।
भिजिट भिसामा बिदेश गएर उतै काम गर्ने नेपालीको डाटा नेपाल सरकारसँग छैन । भिजिट भिसामा गएर उतै लुकीछिपी काम गर्दा उत्पन्न हुने अप्ठ्याराको जबाफदेही को हुने भन्ने प्रश्नचिन्ह खडा भएको देखिन्छ ।
वैदेशिक रोजगारीमा जानू रहर होइन बाध्यता हो । तर भिजिट भिसालाई साहारा बनाएर विदेश पस्नु भनेको आफ्नो जिन्दगी दाउमा लगाएर जुवा खेल्नु सरह हो । जीवन रहे धनको काम आउने हो, जीवन नै नरहे के काम त्यो धनको ? धन कमाउने लालसामा भिजिट भिसामा अर्काको देशमा जानु सरासर गैर कानुनी भएको बताउँछिन् – आप्रवासी स्रोत केन्द्रकी सहजकर्ता सुनिता श्रेष्ठ ।
उनी भन्छिन्- विदेश जान भिजिट भिसामा जानै पर्दैन । अहिले वैदेशिक रोजगारीमा जान पहिले भन्दा सहज छ । तर पनि मानिसले अझै सहजता खोज्दा भैपरी आउने चुनौतीलाई वास्ता गर्दैनन् ।
भिजिट भिसामा वैदेशिक रोजगारीका लागि हिँडेकालाई त्रिभुवन अन्तर्राष्ट्रिय विमानस्थलबाट फर्काउने क्रम बढिरहेको (आप्रवासी स्रोत केन्द्र) कार्यक्रम संयोजक क्षितिज घिसिङ बताउँछन् । मानव तस्करी तथा नक्कली श्रम स्वीकृतिका सन्दर्भमा शंकाको घेरामा परेकालाई दैनिकजसो फर्काउने गरिएको छ। विमानस्थलमा खटिएको मानव बेचबिखन अनुसन्धान ब्युरोले चैत २७ सम्म २ हजार ४ सय २९ वटा राहदानी नियन्त्रणमा लिएर फर्काएको खबर समेत सुनाए घिसिङले ।
खासगरी अवैध तरिकाले घरेलु कामदारका रूपमा भिजिट भिसामा विभिन्न देशमा जान लागेकालाई विमानस्थलबाट फर्काउने गरिएको छ। तस्करहरूले विमानस्थल अध्यागमन, प्रहरी र एयरलाइन्सका कर्मचारीलाई आर्थिक प्रलोभनमा पारेर भिजिट भिसामा नेपालीलाई काम गर्ने गरी खाडी मुलुक पठाउने गरेको पाइएको छ। तस्करले सेटिङमा भिजिट भिसामा दुबई, कतार, साउदी अरेबिया, कुवेतलगायत मुलुकमा कामदार पठाइरहेको स्रोतको दाबी छ।
