मन्थली नगरपालिकाको आयोजनामा ढाका कपडा बुनाइ तालिम सम्पन्न

शर्मिला बुसुन्के, रामेछाप ।
रामेछाप- रामेछापको मन्थली नगरपालिकाको आयोजनामा ७५ दिने ढाका कपडा बुनाइ सम्बन्धी तालिम सम्पन्न भएको छ । मन्थली नगरद्धारा संञ्चालित गरिबी निवारणका लागि उद्ययम विकास कार्यक्रम अन्तर्गत नगरपालिकाको वडा न ६ भलुवाजोर डाँडाखर्कस्थित ज्योती दिदिबहिनी ढाका उद्योगमा २०८० चैत २५ गतेबाट सुरु भएको तालिम आज सम्पन्न भएको हो । यस ढाका कपडा बुनाइ सम्बन्धी तालिममा स्थानीय १३ जना महिला दिदिबहिनीहरुले तालिम लिएका थिए । आज भएको कार्यक्रममा नगरका उपप्रमुख ईश्वरी बस्नेत उद्यम विकास सहजकर्ता मञ्जु दंगाललगायत नगरका प्रतिनिधिहरुको उपस्थिति रहेको थियो ।
कार्यक्रममा नगरका उपप्रमुख बस्नेतले यस अवसरमा तालिम लिएर महिला दिदिबहीनीहरुले सिपको विकास गरेको बताउनुभयो । उहाँले यस ढाका उद्योगमा उत्पादन भएका सम्पुर्ण कपडाहरुको बजारीकरण गर्न नगरपालिका सदैव तयार रहेको जिकिर गर्नुभयो ।
वर्तमान समयमा सिपको महत्व बढ्दै गएको छ । हातमा सिप भएपछि गाँस,बास र कपासको लागि परनिर्भर हुन नपर्ने भएकाले आफुहरुले यस सिप सिकेको सहभागी महिला दिदिबहिनीहरुले बताउनुभयो । यस्तै यस ढाका बुनाइका प्रशिक्षक बिना बसेलले ढाका बुनाइ सम्बन्धी सिपले आफ्नो जीवनमा धेरै महत्व राखेको बताउनुभयो । आफुसँग भएको सिपले विवाह पश्चात पनि आफ्नै मेहेनतले जीवन सहज रुपले चलेको उहाँले बताउनुभयो । गाँउघरमा अझैपनि कतिपय महिला दिदिबहिनीहरु घर भित्रको काममा मात्र सिमित रहँदा हिसांमा पर्ने गरेका छन् । यदि महिला दिदिबहिनीहरु पनि सिप सिकेर आत्मा निर्भर बन्न सके यस्ता हिसां भोग्नु नपर्ने आफुहरुले बुझेको उहाँहरुले बताउनुभयो । साथै मन्थली नगर प्रति आफुहरु आभारी रहेको पनि उहाँहरुले बताउनुभयो ।