ललितपुर । गोदावरीमा सञ्चालन भइरहेको महायज्ञमा एकै दिन १५ लाख आर्थिक संकलन भएको छ । महायज्ञको पाँचौं दिन अर्थात शनिबार विभिन्न संघसंस्था र व्यक्तिगत रुपमा गरी १५ लाख भन्दा बढी दान रकम संकलन भएको महायज्ञ आयोजक मूल समितिका संयोजक एवं वडा नम्बर ३ का वडाध्यक्ष राज घिमिरेले जानकारी दिनुभयो ।
महायज्ञले शिव बस्तिलाई धार्मिक क्षेत्रका रूपमा चिनाउन सहयोग पुग्ने उहाँको विश्वास छ । वडा अध्यक्ष घिमिरेले भन्नुभयो , ‘शिव बस्तीको प्रचार प्रसारको कमि भएको छ, यो बस्ती धार्मिक, साँस्कृतिक एवं पर्यटकीय स्थल पनि हो । यहाँका नागरिकहरू महादेवको दर्सन गर्नका लागि अन्य ठाउँ जानु नपरोस् भनेर विशाल शिव मुर्तिसहित शिवजी धाम निर्माणार्थ महायज्ञमार्फत् आर्थिक संकलन गर्न लागेका हौं ।’
गोदावरी न.पा.३ स्थित शिव बस्तीमा विशाल महादेवको मूर्तिसहित प्रसिद्ध शिवजी धाम निर्माणार्थ आयोजित श्रीमद् भागवत सप्ताह ज्ञान महायज्ञमा सुप्रसिद्ध कथा वाचिका राधिका दासी माता ज्युको मुखारबिन्दुबाट कथा वाचन भईरहेको छ ।महायज्ञमा उपस्थिति भई गूरू बाल योगेश्वर विजयमुर्ति महाराज(विजय भण्डारी)ले महायज्ञको शुभकामना व्यक्त गर्नुहुदै धार्मिक, साँस्कृतिक, प्रकृतिले भरिपुर्ण गोदावरीमा शिवजी धाम निर्माण हुनु एकदम राम्रो पक्ष भएको बताउनुभयो । त्यति मात्रै होईन उहाँले वडा अध्यक्ष राज घिमिरेको चर्चा समेत गर्नुभयो ।
अहिले सामाजिक सञ्जालमा ऐतिहासिक पशुपति कोटिहोमको आम्दानी र खर्चका विषयमा विभिन्न टीका टिप्पणी आईरहेकाले आम भक्तजनहरूमा बाहिर हल्लाका पछाडि नलाग्न अनुरोध गर्नुहुँदै बाल योगेश्वर विजयमुर्ति महाराजले आगामी मंसिर भित्रमा छोरिको घर जेष्ठ नागरिक आश्रम र मामाघर अनाथालय आश्रमको भवन शिलान्यास गरी भवन निर्माण शुरू गर्ने उद्घोष गर्नुभयो ।
महायज्ञ भाद्र ३१ गते आईतबार सम्म मात्रै संचालन हुने पाथीभरा महिला समुहकी अध्यक्ष भगवती कार्की बुढाथोकीले जानकारी दिईन् । महायज्ञपश्चात् शिव बस्तीमा शिवजी धाम बन्नेमा उनी विश्वस्त छिन् । यस्तै , सम्पूर्ण दानबिर दाताहरूलाई धन्यवाद व्यक्त गर्दै संयोजक राज घिमिरेले सबै भक्तजनलाई शान्तिपूर्वक कथा श्रवण गर्न आउन अनुरोध समेत गर्नुभएको छ ।
