दृष्टिकोण र विद्यमान कानुनमा परिवर्तनको खाँचो: मन्त्री तामाङ

हेटौंडा । बागमति प्रदेश सरकारकी उद्योग, वाणिज्य, भूमि तथा सामान्य प्रशासन मन्त्री सुकुमाया तामाङले निजी क्षेत्रलाई हेर्ने सरकारी दृष्टिकोण र विद्यमान कानुनमा परिवर्तनको खाँचो रहेको बताएकी छिन् । व्यवसायीक क्षेत्रले उत्पादन गरेका सामाग्रीको बजार अभाव एकातिर छ भने अर्को तिर सरकारले हेर्ने गलत दृष्टिकोणले समस्या परेको तामाङले वताईन् ।
नेपाल उद्योग वाणिज्य महासंघ बागमति प्रदेशको आठौं प्रदेश सभाको शनिबार हेटौंडामा उद्घाटन गर्दै तामाङले भनिन् – महिलाहरु संचालक भएको उद्योग व्यवसाय दर्ता गर्दा लाग्ने शूल्कमा ५० प्रतिशत छुट गरीसकेको र एउटा व्यवसायीले विभिन्न निकायमा पुगेर व्यवसाय दर्ता, नविकरण र कर तिर्नुपर्ने बाध्यताको अन्त्यका लागि काम गरीरहेका छौं । मन्त्री तामाङले व्यवसायीका छोराछोरीले उद्योग व्यवसाय क्षेत्रको अवस्था र संभावनाको बारेमा खोज अनुसन्धान गर्न चाहेमा प्रति विद्यार्थी १० लाख उपलव्ध गराउने योजना अघी सारेको वताईन ।
हामी आउने आर्थिक बर्षकालागि निती तथा कार्यक्रम बनाउने संघारमा छौं तामाङले भनिन् – व्यवसायीहरुले दिने सुझावहरु वजेट कार्यक्रम मार्फत संवोधन गर्ने प्रतिवद्धता प्रकट गरिन् । तामाङले नेपालको विकासमा उद्योग वाणिज्य क्षेत्रले खेलेको भूमिका महत्वपूर्ण रहेको उल्लेख गरिन् ।
प्रदेश सम्मेलनलाई संवोधन गर्दै नेपाल उद्योग वाणिज्य महासंघका अध्यक्ष चन्द्र ढकालले संविधानले दिएको अधिकार भन्दैमा आन्दोलनका क्रममा व्यवसायीक क्षेत्र माथि हुने ढुंगामुढा रोक्नुपर्ने वताए । जुलुस भयो भने त्यहि उद्योग प्रतिष्ठानमा ढुंगा हान्ने , आगो लगाउने काम भएका छन् ढकालले भने – निजी क्षेत्रलाई निरुत्साहित गर्ने काम कहिँ कतैबाट नहोस ।
ढकालले देशमा ८० प्रतिशत भन्दा बढी राजश्वको योगदान निजी क्षेत्रको रहेको र देशमा संचालन भएका योजना निर्माण होस या अन्य कार्यमा निजी क्षेत्रले तिरेको राजश्वको भरमा चलेको दावि गरे ।
सरकारले आगामी आर्थिक बर्षका लागि बजेट तथा कार्यक्रम माथि छलफल चलाइरहेकोले तर्कपूर्ण रुपमा बजेट तथा कार्यक्रम समावेश गर्नुपर्ने पक्षहरु माथि गम्भिर भएर सुझाव दिन व्यवसायीहरुलाई आग्रह गरे ।
नेपाल उद्योग वाणिज्य महासंघ बागमति प्रदेशका अध्यक्ष दिलसुन्दर श्रेष्ठको अध्यक्षतामा भएको उक्त प्रदेश सभामा बागमति प्रदेशका विभिन्न जिल्लाका जिल्ला तथा नगर उद्योग बाणिज्य संघका पदाधिकारीहरुको सहभागिता रहेको थियो ।