हेटौंडा, बागमती – “देश विकासको मेरुदण्ड भनेकै युवा शक्ति हो,” भन्ने धारणा अब केवल नारा होइन, बागमती प्रदेश युवा परिषद्का लागि यो व्यवहारमा उतार्ने अठोट बनेको छ। परिषद्का कार्यकारी उपाध्यक्ष सन्तोष चौलागाईं र कार्यालय प्रमुख रमेश घिमिरेको सक्रिय नेतृत्वमा परिषद्ले छोटो समयमै युवामाझ गहिरो प्रभाव पार्न थालेको छ। नेतृत्व विकासदेखि रोजगारी, सिप विकास, सामाजिक चेतना र आत्मनिर्भरतासम्मका क्षेत्रमा परिषद्ले फरक पहिचान बनाउँदै आएको छ।
परिकल्पनाको जग : युवा–नेतृत्वयुक्त समृद्धि
बागमती प्रदेश युवा परिषद् प्रदेश सरकारले स्थापित गरेको एक सशक्त युवा संस्था हो, जसको मूल उद्देश्य प्रदेशभरि छरिएका युवालाई संगठित गर्दै नेतृत्व, सिप र अवसर प्रदान गर्नु हो। “युवा परिचालन गरियो भने देश बन्न धेरै समय लाग्दैन,” कार्यकारी उपाध्यक्ष सन्तोष चौलागाईंले बारम्बार दोहोर्याउने वाक्य हो यो। उनी परिषद्लाई केवल कागजी संस्था बनाइराख्ने पक्षमा छैनन्—उनी युवाको विचार, शक्ति र सृजनशीलतालाई व्यावहारिक जीवनसँग गाँस्न चाहन्छन्।
क्रियाशीलता : कार्यक्रमभन्दा परिवर्तनमुखी सोच
परिषद् नेतृत्वमा आएको छोटो अवधिमै नमुना युवा सम्मेलन, महिला आत्मरक्षा तालिम, नेतृत्व विकास गोष्ठी, सिपमूलक तालिम जस्ता कार्यक्रमहरू प्रदेशका विभिन्न जिल्लामा सञ्चालन भएका छन्। हालै सम्पन्न भएको महिला आत्मरक्षा प्रशिक्षक पुनर्ताजगी तालिम हेटौंडामा सम्पन्न हुँदा त्यसले महिलामा आत्मविश्वास जगाएको मात्र होइन, प्रशिक्षक उत्पादन गर्ने जिम्मेवारी पनि परिषद्ले लिएको स्पष्ट देखियो।
कार्यक्रममा उपाध्यक्ष चौलागाईंले भनेका थिए, “स्रोत सामान्य दिने अनि काम गर भन्नु हात बाँधेर भात खानूजस्तै हो। स्रोत र अधिकार उपलब्ध गराइयो भने हामी दुई वर्षमै प्रदेशलाई समृद्ध बनाउने बाटोमा अघि बढाउँछौं।” यो आत्मविश्वास केवल भाषणको कुरा होइन, उनकै पहलमा सुरुवात भएका परियोजनाहरूले आज स्थानीय युवाको जीवनशैलीमा परिवर्तन ल्याउन थालेका छन्।
शासकीय संयोजन : कार्यालय प्रमुखको जिम्मेवार भूमिका
कार्यक्रम सञ्चालन, समन्वय र व्यवस्थापनको पूरक पक्ष सम्हाल्दै आएका रमेश घिमिरे, परिषद्का कार्यालय प्रमुखका रूपमा देखिए तापनि उनी केवल कागजी प्रक्रिया हेर्ने पदमा सीमित छैनन्। युवासँग प्रत्यक्ष सम्पर्क, कार्यान्वयन निगरानी र संस्थागत सुदृढीकरणमा उनको सक्रियता उल्लेखनीय छ। उनले युवा परिषद्लाई प्रादेशिक नीति निर्माणको एउटा नमुना संस्थामा रूपान्तरण गर्न प्रयासरत छन्।
अवसर र चुनौती दुवैसँग जुध्दै
हाल परिषद्ले कार्यक्रम सञ्चालनमा स्रोतको अभाव महसुस गरिरहेको छ। तर, नेतृत्वदायी टोलीको प्रतिबद्धता र दूरदृष्टिले गर्दा स्थानीय तहसँग समन्वय गरेर, न्यून स्रोतमै प्रभावकारी कार्यक्रमहरू सञ्चालन हुँदै आएका छन्। “यदि नीति निर्माणमै युवाको सहभागिता सुनिश्चित गरियो भने उनीहरूलाई विदेश पलायनबाट रोक्न सकिन्छ,” चौलागाईं बताउँछन्।
अन्तिम शब्द : युवा जागरणको बिन्दु
बागमती प्रदेश युवा परिषद् आज केवल कार्यक्रम आयोजना गर्ने संस्था होइन—यो युवाको भविष्य निर्माणको कारखाना बन्ने दिशामा अग्रसर छ। उपाध्यक्ष चौलागाईंको जोश, प्रमुख घिमिरेको योजना कार्यान्वयनमा निपुणता र प्रदेश सरकारको न्यूनतम सहयोगले पनि परिषद्ले ठूलो सपना देखेको छ।
युवालाई शक्ति होइन, क्षमता मान्ने सोचले अगाडि बढेको परिषद् यदि अझ सशक्त स्रोत र अधिकारले सुसज्जित हुन्छ भने, बागमती प्रदेशभित्र युवा नेतृत्वको नयाँ अध्याय लेखिने छ – जुन इतिहासको गर्विलो हिस्सा बन्न सक्छ।
