रामेछाप ।जिल्ला प्रशासन कार्यालय रामेछापले सेवाग्राहीहरूलाई गुनासो तथा सुझाव दिन सजिलो बनाउने उद्देश्यले क्यूआर (QR) कोड सार्वजनिक गरेको छ। ‘क्विक रेस्पोन्स’ प्रणालीमार्फत नागरिकले अब घरमै बसेर आफ्नो गुनासो तथा सुझाव सजिलै पठाउन सक्नेछन्।
प्रमुख जिल्ला अधिकारी श्यामकृष्ण थापाका अनुसार, यो पहलले नागरिकलाई वडापत्रबारे जानकारी लिन र प्रशासनसँग सिधा संवाद गर्न सहयोग पुर्याउनेछ। सेवा प्रवाहमा पारदर्शिता र जवाफदेहितामा सुधार ल्याउने लक्ष्यसहित क्यूआर कोड सुरु गरिएको हो।
यसै अवसरमा, जिल्ला प्रशासन कार्यालयले जिल्लाभरिका सूचना अधिकारी र पत्रकारहरूसँग अन्तरक्रियात्मक कार्यक्रमसमेत आयोजना गरेको थियो। कार्यक्रममा सहभागी पत्रकारहरूले अधिकांश सूचना अधिकारीहरूको मोबाइल फोन अफ रहने, सूचना अधिकारसम्बन्धी ऐन प्रभावकारी रूपमा लागू नभएको, र सूचनाको पहुँच अझै कमजोर रहेको गुनासो गरेका थिए।
सूचना अधिकारीहरू आफ्नै कार्यालयका विवरणहरूबारे स्पष्ट जानकारी नहुने स्थिति रहेको भन्दै पत्रकारहरूले सूचना व्यवस्थापन प्रणालीलाई अझ प्रभावकारी बनाउन सुझावसमेत दिएका थिए।
जिल्ला प्रशासनको यो डिजिटल पहल सकारात्मक देखिए तापनि सूचनाको हक कार्यान्वयनमा देखिएको कमजोरी समाधान नभएसम्म नागरिकको पहुँच र विश्वासमा अपेक्षित सुधार आउन सक्ने देखिँदैन।
