नुवाकोट। शिवपुरी गाउँपालिका महिला संघको पालिका अधिवेशन मंगलबार सेराबगरस्थित कृषि भवनमा भव्य रूपमा सम्पन्न भएको छ। कार्यक्रमले नयाँ नेतृत्व चयन गर्दै महिला सशक्तीकरणतर्फ थप प्रभावकारी कदम अघि बढाएको छ।
अधिवेशनले पार्वती थपलियालाई पालिका संयोजकमा चयन गरेको छ। साथै, गाउँपालिकाभित्रका सबै वडाबाट प्रतिनिधित्व हुने गरी वडा संयोजकहरू पनि चयन गरिएका छन्। नवनियुक्त वडा संयोजकहरूमा ईन्दिरा न्यौपाने, सुनिता श्रेष्ठ, निर्मला भण्डारी, रामदेवी श्रेष्ठ, कविता ढुंगाना, अप्सरा वखती, ज्ञानी खतिवडा पाण्डे र भरतकुमारी थापा रहेका छन्।
कार्यक्रममा सहभागी वक्ताहरूले महिला संघले विगतमा खेलेको भूमिकाको प्रशंसा गर्दै आगामी दिनमा महिलाहरूको स्थानीय तहमा सक्रिय सहभागिता सुनिश्चित गर्न संघ अझ क्रियाशील बन्नुपर्ने धारणा व्यक्त गरे।
बागमती प्रदेश महिला विभाग सदस्य तथा जिल्ला समन्वय समितिकी निवर्तमान उपप्रमुख अप्सरा थापाले नव-निर्वाचित नेतृत्वलाई बधाई दिँदै महिला अधिकार, सशक्तीकरण र समावेशी विकासका लागि प्रभावकारी कार्यक्रम सञ्चालन गरिने प्रतिबद्धता जनाइन्। उनले यस अधिवेशनले गाउँपालिकामा महिलाको सहभागिता र नेतृत्व विकासमा नयाँ ऊर्जा थपेको विश्वास व्यक्त गरिन्।
कार्यक्रममा प्रमुख अतिथि भूमिसमस्या आयोगका अध्यक्ष अर्जुन प्रसाद न्यौपाने, पालिका अध्यक्ष गोविन्द प्रसाद थपलिया, नेपाली कांग्रेस पालिका सभापति कविराज गुरुङ, जिल्ला महिला संघ सभापति सरिता आचार्य, किसान संघका केन्द्रीय सदस्य माधव भेटवाल, शिक्षक संघ नुवाकोटका पूर्व अध्यक्ष राम बी. थापा, वडा अध्यक्षहरू, पार्टी महाधिवेशन प्रतिनिधि, जिल्ला सदस्यहरू तथा विभिन्न संघसंस्थाका प्रतिनिधिहरूको उपस्थिति थियो।
साथै, कार्यक्रममा नेकाका क्षेत्र (प्रदेश क) सभापति हरि दुलाल, सचिव सृजना तामाङ, वडा १ का मोक्तान, वडा ७ का मुकुन्द प्रसाद पाण्डे, वडा अध्यक्ष केशव रिजाल, चन्द्र बी. गुरुङ, जिल्ला सदस्य रामेश्वर थापा, बलराम कार्की, तारा केसी, महिला संघ जिल्ला सदस्य ईन्दिरा थापा र अमृता डंगोलले नव-निर्वाचित टोलिलाई शुभकामना व्यक्त गरे।
कार्यक्रम शिवपुरी गाउँपालिका महिला संघकी पालिका सभापति ललिता भण्डारीको सभापतित्वमा सम्पन्न भएको थियो।
