सिन्धुली : सुनकोशी गाउँपालिकाको आयोजनामा आयोजित विद्यार्थीसँग–जनप्रतिनिधि अन्तरक्रिया कार्यक्रम, छात्रवृत्ति वितरण तथा नीति तथा कार्यक्रमका लागि सुझाव संकलन कार्यक्रम भव्यताका साथ सम्पन्न भएको छ।
कार्यक्रम सुनकोशी गाउँपालिकाकी अध्यक्ष दिपा बोहोरा दाहालको अध्यक्षता र संघीय सांसद माननीय लेखनाथ दाहाल (राजन) को प्रमुख आतिथ्यतामा सम्पन्न भएको हो।
कार्यक्रममा गाउँपालिकाका प्रमुख प्रशासकीय अधिकृत अर्जुन दर्जी, उपाध्यक्ष कपिल कुमार कोइराला, सातै वडाका वडा अध्यक्ष, कार्यपालिका सदस्यहरू, १० वटा विद्यालयका प्रधानाध्यापकहरू, साथै विभिन्न सञ्चारमाध्यमका पत्रकार तथा संचारकर्मीहरूको उल्लेख्य सहभागिता रहेको थियो।
गाउँपालिकाको नेतृत्वमा सञ्चालित उक्त कार्यक्रममा एमबीबीएस अध्ययनरत तिनजना विद्यार्थीहरू प्रकाण्ड सुशन तोलंगे, रमेश श्रेष्ठ, युनिश प्रधानलाई प्रति विद्यार्थी रु २,००,००० को दरले छात्रवृत्ति वितरण गरिएको छ। त्यस्तै, एसईईमा उत्कृष्ट प्रदर्शन गर्ने विद्यार्थी सनिष श्रेष्ठ र प्राविधिक धारमा अध्ययनरत ४६ जना गरी जम्मा ५० जना विद्यार्थीहरूलाई छात्रवृत्तिको सम्मान प्रदान गरिएको हो।
उक्त कार्यक्रममा झण्डै २०० जना विद्यार्थीहरूको सहभागिता रहेको थियो। विभिन्न विद्यालयबाट आएका विद्यार्थीहरूले जनप्रतिनिधिहरूसँग प्रत्यक्ष संवाद गर्दै आफ्ना प्रश्न, जिज्ञासा तथा गुनासाहरू राखेका थिए। सो प्रश्नहरूको जवाफ गाउँपालिका अध्यक्ष, उपाध्यक्ष, विद्यालयका प्रधानाध्यापकहरू र प्रतिनिधिसभा सदस्य माननीय राजन दाहाल ज्यूले प्रदान गर्नुभएको थियो।
यस कार्यक्रममार्फत विद्यार्थीहरूको आवाज सुन्ने, उनीहरूको समस्या बुझ्ने र आगामी नीति तथा कार्यक्रम तर्जुमा गर्ने उद्देश्य राखिएको छ।
सुनकोशी गाउँपालिकाले भविष्यमा पनि यस्ता सहभागितामूलक कार्यक्रमलाई निरन्तरता दिने प्रतिबद्धता जनाएको छ।
