उमाकुण्ड गाउँपालिकाको नयाँ नीति, कार्यक्रम र बजेट सार्वजनिक: शिक्षा, स्वास्थ्य, पूर्वाधार र पर्यटनमा विशेष जोड

रामेछाप, ११ असार
रामेछाप जिल्लाको उमाकुण्ड गाउँपालिकाले आगामी आर्थिक वर्ष २०८२/०८३ का लागि ६१ करोड १३ लाख २३ हजार ४ सय २६ रुपैयाँको बजेट सार्वजनिक गरेको छ।

गाउँपालिकाले शिक्षा, स्वास्थ्य, पूर्वाधार, पर्यटन र सामाजिक न्यायलाई आफ्नो नीति तथा कार्यक्रमको मुख्य आधार बनाएको छ।

मंगलबार सम्पन्न गाउँसभामा अध्यक्ष शेरबहादुर सुनुवारले नीति तथा कार्यक्रम प्रस्तुत गर्नुभएको थियो भने उपाध्यक्ष सावित्री सुनुवारले बजेट प्रस्तुत गर्नुभयो। प्रस्तुत दुवै प्रस्तावहरू सर्वसम्मत रुपमा पारित भएका छन्।

अध्यक्ष सुनुवारले भन्नुभयो, “शिक्षा र स्वास्थ्य जस्ता आधारभूत क्षेत्र बलियो नबनाई विकास सम्भव हुँदैन। यस बजेटलाई प्रभावकारी ढंगले कार्यान्वयन गर्नु हाम्रो प्रमुख लक्ष्य हो।“

उमाकुण्ड गाउँपालिकाले ११८ बुँदे कार्यसूचीमार्फत पाँच प्रमुख क्षेत्रहरूलाई प्राथमिकता दिएको छ:

1. शिक्षा: प्राथमिक र माध्यमिक विद्यालयहरूको गुणस्तर सुधार
2. स्वास्थ्य: सेवा स्तरोन्नति, मातृशिशु स्वास्थ्य विस्तार, मानसिक स्वास्थ्य र पोषण कार्यक्रम
3. पूर्वाधार: सडक सुधार, पुल निर्माण, खानेपानी, सौर्य ऊर्जा र यातायात सञ्जाल विस्तार
4. पर्यटन: धार्मिक, सांस्कृतिक र प्राकृतिक पर्यटन प्रवर्द्धन
5. सामाजिक न्याय: सामाजिक सुरक्षा, लैङ्गिक समानता, अपाङ्गता र महिला सशक्तीकरण

गाउँपालिका उपाध्यक्ष सावित्री सुनुवारले प्रस्तुत गर्नुभएको बजेटमा गाउँपालिकाले ७ वटै वडामा वडागत आवश्यकता, भौगोलिक अवस्था, जनघनत्व र विकास सूचकको आधारमा बजेट विनियोजन गरेको बताउनुभयो ।

कार्यान्वयन सुदृढीकरणका लागि वडागत योजना व्यवस्थापन समिति र गाउँपालिका अनुगमन समिति सक्रिय बनाइने जनाइएको छ।

गाउँपालिकाले महिला सशक्तीकरण, बालविवाह न्यूनीकरण, घरेलु हिंसा न्यूनीकरण, अपाङ्गता भएका व्यक्तिका अधिकार र सामाजिक सुरक्षा कार्यक्रमलाई निरन्तरता दिने नीति लिएको छ। साथै, बालबालिका, किशोरी र वृद्ध वृद्धालाई लक्षित गर्दै विशेष कार्यक्रम सञ्चालन गरिनेछ।

पूर्वाधार विकासमा गाउँपालिकाले सडक सुधार, पुल निर्माण, खानेपानी योजना, कृषि सिँचाइ र सौर्य ऊर्जामा विशेष जोड दिएको छ। हिमाली बस्तीहरूमा यातायात सेवा विस्तार गर्ने प्राथमिक योजना बनाइएको छ।

पर्यटन प्रवर्द्धनतर्फ उमाकुण्ड धार्मिक स्थल, चुचुरे–गुम्देल–उमाकुण्ड पदमार्ग, प्रीति गुफा र भूजीका ऐतिहासिक क्षेत्रहरूलाई पर्यटकीय गन्तव्य बनाइने योजना अघि सारिएको छ।

उमाकुण्ड गाउँपालिका अब सेवा प्रवाहलाई छिटो, सजिलो र पारदर्शी बनाउन डिजिटल प्रणालीमार्फत अघि बढ्ने भएको छ। गाउँपालिकाले विद्युतीय अभिलेख व्यवस्थापन, अनलाइन आवेदन प्रणाली, नागरिक बडापत्र र मोबाइल एप निर्माण गर्ने योजना बनाएको छ। यसका साथै, नागरिक गुनासो दर्ता, योजना माग संकलन र सार्वजनिक सुनुवाइ प्रक्रिया समेत अब अनलाइनमार्फत सहज रूपमा गर्न सकिने व्यवस्था मिलाइनेछ।

योजना कार्यान्वयनका क्रममा पर्यावरणीय सन्तुलन र जलवायु संरक्षणलाई समेत विशेष प्राथमिकता दिइने भएको छ। वन क्षेत्र संरक्षण, हरित पूर्वाधार निर्माण, सौर्य ऊर्जा प्रवर्द्धन, वातावरणीय शिक्षा कार्यक्रम जस्ता कार्यक्रमलाई सक्रिय रूपमा अघि बढाउनेछ। साथै, ग्रामीण जलवायु जोखिम न्यूनीकरणका लागि नयाँ साझेदारी कार्यक्रम सञ्चालन गर्ने तयारीसमेत गरिएको छ।

पालिकाले आन्तरिक स्रोतबाट २ करोड रुपैयाँ राजस्व संकलन गर्ने लक्ष्य राखेको छ भने बाँकी स्रोत संघीय, प्रदेश सरकार र साझेदारी कार्यक्रमबाट जुटाइनेछ।