काठमाडौं, १६ असार
सभामुख देवराज घिमिरेले लोकतन्त्रप्रति जनतामा सकारात्मक सन्देश प्रवाह गर्न पूर्वसांसदहरूको भूमिका महत्वपूर्ण रहने बताउनुभएको छ। पूर्वसांसद मञ्चले ६७औं संसद् दिवसको अवसरमा आज काठमाडौंमा आयोजना गरेको कार्यक्रममा बोल्दै सभामुख घिमिरेले लोकतन्त्रप्रति जनतामा विकर्षण फैलाउने प्रयास भइरहेको वर्तमान अवस्थामा पूर्वसांसदहरूले जनचेतना अभिवृद्धिमा विशेष योगदान दिनुपर्ने आवश्यकता औंल्याउनुभयो।
सभामुख घिमिरेले संसदीय लोकतान्त्रिक व्यवस्थामाथि चुनौती दिन खोजिने प्रवृत्तिप्रति सचेत रहन सबै लोकतन्त्रवादीहरूलाई आह्वान गर्दै लोकतन्त्र सुदृढ बनाउन पूर्वसांसदहरूको सक्रिय भूमिका अपरिहार्य रहेको उल्लेख गर्नुभयो। साथै, संसद्लाई अझ प्रभावकारी र जनउत्तरदायी बनाउन ‘थिङ्क ट्याङ्क’ स्थापना गरी निरन्तर छलफल आवश्यक रहेको बताउनुभयो।
सभामुख घिमिरेले दस वर्षदेखि रोकिएको संघीय निजामती विधेयक र संक्रमणकालीन न्यायसम्बन्धी कानुन चालु अधिवेशनमै टुंगोमा पुग्ने विश्वास व्यक्त गर्नुभयो। साथै, तीन महिनाअघि नै बजेटका सिद्धान्त र प्राथमिकतामा छलफल सुरु गर्ने अभ्यास अघिल्लो वर्ष प्रभावकारी हुन नसकेको समेत स्मरण गराउनु भयो।
आर्थिक विधेयक पारित गर्ने संसद्को वार्षिक प्रक्रिया सम्बन्धमा समेत उनले बहस आवश्यक रहेको बताउनु भयो।वर्षे अधिवेशनको धेरै समय आर्थिक विधेयकमै केन्द्रित हुने गरेकाले यस किसिमको छलफल आवश्यक हो वा होइन भन्नेमा यस्ता मञ्चमा छलफल गरेर निष्कर्षमा पुग्नुपर्ने उहाँको भनाइ थियो।
