रामेछाप,मन्थली : नेपाल आदिवासी जनजाति पत्रकार महासंघ (फोनिज)को २६औं स्थापना दिवसमा रामेछापका दुई पत्रकारलाई विशेष सम्मान प्रदान गरिएको छ।
सम्मानित हुनेमध्ये नेपाल पत्रकार महासंघ रामेछापका पूर्व अध्यक्ष बद्री नयाँघरे र नेपाल प्रेस युनियन रामेछापकी अध्यक्ष ज्ञानु श्रेष्ठ हुनुहुन्छ। मन्थलीमा आयोजना गरिएको समारोहमा नगर प्रमुख लब श्रेष्ठले उहाँहरूलाई दोसल्ला ओढाउँदै नगद १० हजार रुपैयाँको सम्मान राशि हस्तान्तरण गर्नुभएको हो।
फोनिजले प्रत्येक वर्ष आफ्नो स्थापना दिवसमा दुई श्रेणीका पत्रकारलाई सम्मान गर्ने परम्परा राख्दै आएको छ। जनजाति विषयमा खोजमूलक पत्रकारिता गर्ने एक जना र फोनिजसँग आबद्ध एक जना सदस्य पत्रकार। यसपटक जनजाति सम्बन्धी खोजमूलक समाचारका लागि करिब ३० वर्षदेखि पत्रकारिता गर्दै आउनुभएको नयाँघरे सम्मानित हुनुभएको छ भने, फोनिज सदस्यको तर्फबाट पत्रकारिता यात्रामा १५ बर्ष देखि सक्रिय श्रेष्ठ सम्मानित हुनुभएको हो।
कार्यक्रमको अध्यक्षता फोनिज रामेछापका अध्यक्ष कुमार श्रेष्ठले गर्नुभएको थियो। कार्यक्रममा फोनिज बागमती प्रदेशका अध्यक्ष युवराज श्रेष्ठ, नेपाल पत्रकार महासंघका केन्द्रीय सदस्य नवराज पथिक, महासंघ रामेछापका अध्यक्ष दिपक घिमिरे, पूर्व अध्यक्षहरू हिमाल ढुंगेल र टिका प्रसाद भट्टलगायतका वक्ताहरूले स्थापना दिवसको शुभकामना व्यक्त गर्नुभयो।
‘रामेछापको पर्यटन सम्भावना’ र ‘जनजाति पत्रकारिताको अवस्था’ विषयक अवधारणा पत्र क्रमशः पत्रकार नवराज श्रेष्ठ र सुमित्रा तामाङले प्रस्तुत गर्नुभएको थियो।
