मन्थली : रामेछापको मन्थली नगरपालिका–६ भलुवाजोरस्थित बोक्से पहरामा स्कारपियो गाडी दुर्घटना हुँदा एक महिलाको ज्यान गएको छ। जिल्ला प्रहरी कार्यालयका प्रहरी निरीक्षक कौशल न्यौपानेका अनुसार बा १३ च ३९३५ नम्बरको स्कारपियो आइतबार बिहान मन्थलीबाट हेटौँडा जाँदै गर्दा सडकबाट खस्दा मन्थली–११ गेलुकी करिब ४० वर्षीया राधा चौहानको घटनास्थलमै मृत्यु भएको हो।
दुर्घटनामा उनका श्रीमान्, करिब ४२ वर्षीय उत्तम चौहान घाइते भएका छन्। घाइते चौहानलाई मन्थलीस्थित रामेछाप सामुदायिक अस्पतालमा प्रारम्भिक उपचारपछि थप उपचारका लागि काठमाडौं पठाइएको जिल्ला प्रहरी कार्यालयका प्रहरी निरीक्षक न्यौपाने जानकारी दिनुभयो।
प्रहरीका अनुसार मृतकको शव पोस्टमार्टमका लागि मन्थली अस्पताल ल्याइएको छ। गाडी अप्ठ्यारो भिरमा अड्किएकाले उद्धारमा कठिनाइ भएको र दुर्घटनाको कारण खुल्न बाँकी रहेको जनाइएको छ।
