ललितपुर: नेपाली कांग्रेसका महामन्त्री विश्वप्रकाश शर्माले डिजिटल दुनियाँमा प्रविधिको सही उपयोगका लागि हरेक नागरिकलाई सचेत गराउनुपर्ने आवश्यकता औँल्याएका छन्।
नेपाली कांग्रेस सूचना, सञ्चार तथा प्रचार विभागद्वारा आज आयोजित ‘डिजिटल प्लेटफर्मको प्रयोग, प्रभाव र असर’ विषयक अन्तरक्रियात्मक तालिमको उद्घाटन सत्रमा महामन्त्री शर्माले डिजिटल माध्यमको दुरुपयोगले मानिसको जीवनसमेत प्रभावित हुन सक्ने भन्दै सचेत रहनुपर्नेमा जोड दिए।
उनले भने, “डिजिटल माध्यमको कारण समाजमा अप्ठ्यारो स्थिति सिर्जना भएको छ। यसबारे सचेत गराउनु पार्टीको जिम्मेवारी हो। पछिल्लो पुस्तासम्म पार्टीको सन्देश पुर्याउन, कांग्रेसको प्रचार गर्न, नकारात्मक भाष्यको सामना गर्न, सरकारका कमजोरी सुधार गर्न र अभिव्यक्ति स्वतन्त्रताको सम्मान गर्दै डिजिटल माध्यमको सही प्रयोग आवश्यक छ।”
कार्यक्रममा पार्टीका सहमहामन्त्री महेन्द्र यादवले भने कि पार्टीभित्रका गुटबीच प्रतिस्पर्धाका लागि डिजिटल माध्यमको गलत प्रयोगले पार्टीलाई क्षति पुर्याएको छ। उनले डिजिटल माध्यमको सही प्रयोगबाट समाजमा सकारात्मक सन्देश प्रवाह गर्न र चुनावी परिचालनमा लाभ लिन सकिने बताए।
पार्टीका कोषाध्यक्ष उमेश श्रेष्ठले पनि पार्टीको प्रचारप्रसारलाई सशक्त बनाउन डिजिटल माध्यमको प्रभावकारी उपयोग आवश्यक रहेको धारणा राखे।
