ललितपुर: नेपाल कम्युनिष्ट पार्टी (एमाले) का अध्यक्ष एवं प्रधानमन्त्री केपी शर्मा ओलीले अरु कुरा सह्य भए पनि देशलाई हेप्ने प्रवृत्ति सहन नसकिने बताएका छन्।
ललितपुरको गोदावरीस्थित सनराइज सम्मेलन केन्द्रमा शुक्रबारदेखि जारी विधान महाधिवेशनको आज समापन सत्रलाई सम्बोधन गर्दै उनले बेथिति र हेपाहा प्रवृत्तिको सधैं विरोध गर्ने स्पष्ट पारे।
“राष्ट्रियता कविता वा क्षणिक स्वार्थ होइन, स्वाधीनता र राष्ट्रिय स्वाभिमानका लागि बलिदान दिँदै आएका हौं,” अध्यक्ष ओलीले भने। उनले सामाजिक सञ्जालको विरोध एमालेले नगरेको उल्लेख गर्दै नेपालमा व्यवसाय गर्ने तर कानुन विपरीत क्रियाकलाप भने सह्य नहुने बताए।
प्रधानमन्त्री ओलीले समाजलाई भड्काउने प्रवृत्तिप्रति चिन्ता व्यक्त गर्दै ‘जेनजी पुस्ता देशलाई माया गर्ने पुस्ता’ भएको उल्लेख गरे।
सामाजिक सञ्जाल दर्ताबारे सरकारको एक वर्षअघिको निर्णय स्मरण गराउँदै उनले स्वाधीनता स्वाभिमानबाट प्राप्त हुने र स्वाभिमानबाट नै स्वतन्त्रता सम्भव हुनेमा जोड दिए।
उनले असमानता कम गर्दै विभेद अन्त्य गर्ने नीति एमालेको रहेको बताउँदै छलफलबाट प्राप्त नीतिलाई अङ्गीकार गर्दै ‘मिसन ८४’ सफल बनाउन पार्टी अघि बढिरहेको उल्लेख गरे।
