काठमाडौं: सूचीकृत नभएका सामाजिक सञ्जाल बन्द गर्ने सरकारको निर्णयप्रति नेपाली कांग्रेसले असन्तुष्टि व्यक्त गरेको छ। आइतबार सभापति शेरबहादुर देउवाको निवास बुढानीलकण्ठमा बसेको पदाधिकारी तथा पूर्वपदाधिकारीहरूको बैठकमा नेताहरूले निर्णयप्रति आपत्ति जनाउँदै सरकारको ध्यानाकर्षण गराउनुपर्ने निष्कर्ष निकाले।
बैठकमा नेताहरूले सामाजिक सञ्जाललाई नियमन गर्ने विकल्प हुँदाहुँदै बन्द नै गर्नु सही नभएको बताएका थिए। सभापति देउवाले अदालतको आदेशअनुसार सरकारलाई आवश्यक कानुन बनाउन आग्रह गर्नुपर्ने प्रस्ताव राखे। अन्य नेताहरूले कानुन निर्माणपछि सूचीकृतका लागि समय थपिन सक्ने भए पनि बलपूर्वक बन्द गर्नु उपयुक्त नहुने सुझाव दिए।
महामन्त्री गगनकुमार थापाले सामाजिक सञ्जाल बन्द गर्दा शीर्ष दल र नेताप्रति युवा पुस्ता अझै असन्तुष्ट हुने बताए। उनले नियमनको नाममा जनता दुःख पाएको उल्लेख गर्दै निर्णय सच्याउन आग्रह गरे। कांग्रेसले यस विषयमा विज्ञहरूसँग छलफल गरेर आधिकारिक धारणा बनाउने निर्णय गरेको छ।
