काठमाडौँ: नेपाली सेनाले हालैको जेनजी आन्दोलनका क्रममा लुटिएका हातहतियार तथा सुरक्षा सामग्रीहरू फिर्ता गर्न आग्रह गरेको छ।
बुधबार जारी गरेको विज्ञप्तिमार्फत सेनाले आन्दोलनका क्रममा सुरक्षाकर्मीहरूबाट लुटिएका वा फेला परेका हतियार, गोलीगट्टा र अन्य सुरक्षा सामग्रीहरू नजिकको सुरक्षा निकाय वा सुरक्षाकर्मीलाई तुरुन्तै बुझाउन अनुरोध गरेको हो।
साथै सेनाले संवेदनशील परिस्थितिमा सुरक्षा निकायका पोशाकको अनाधिकृत प्रयोग नगर्न पनि नागरिकहरूलाई सचेत गराएको छ।
विज्ञप्तिमा भनिएको छ
‘जेनजी’ नेतृत्वको आन्दोलनका क्रममा कोही कसैले सुरक्षाकर्मीहरुबाट लुटिएका / फेला पारेका हातहतियार, गोलीगट्टा एवम् सुरक्षा सामग्रीहरु नजिकको सुरक्षा निकाय वा सुरक्षाकर्मीलाई यथाशीघ्र बुझाउनुहुन अनुरोध गरिन्छ। त्यस्ता हातहतियारहरुको दुरुपयोग भई जनधनको क्षति हुनसक्ने भएकोले त्यस सम्बन्धी सूचना प्राप्त गर्नुहुने व्यक्तिहरुले सुरक्षा निकायलाई जानकारी गराउन र सम्बन्धितलाई हतियार बुझाउन प्रेरित गर्नुहुन अनुरोध गरिन्छ। साथै, यस संवेदनशील परिस्थितिमा सुरक्षा निकायका पोशाकहरुको अनाधिकृत प्रयोग नगर्नुहुन समेत अनुरोध छ। साथै, उक्त हातहतियार र गोलीगट्ठा नबुझाई कसैसँग फेला परेमा प्रचलित कानून बमोजिम कारवाही हुने बेहोरा समेत अनुरोध गरिन्छ।
