काठमाडौँ, असोज २४ । प्रधानन्यायाधीश प्रकाशमानसिंह राउतले नागरिकको न्याय प्राप्तिको अधिकार अक्षुण राखिने प्रतिबद्धता व्यक्त गरेका छन्।
सर्वोच्च अदालतमा नेपाल बार एशोसिएसन, सर्वोच्च बार एशोसिएसन, महान्यायाधिवक्ता कार्यालय तथा उपत्यका बार एशोसिएसनका पदाधिकारीहरूसँग आज भएको छलफलमा प्रधानन्यायाधीश राउतले अदालतको सेवा चाँडै पूर्ण रूपमा सञ्चालन गरिने जानकारी दिएका हुन्।
“शीघ्र सेवा सञ्चालन गर्छौं,” उनले भने, “सर्वोच्च अदालतको सूचना प्रविधि ‘रिकभर’ हुनेबित्तिकै अदालत पूर्ण रूपमा सञ्चालन हुनेछ।” उनका अनुसार सूचना प्रविधि शाखाले दिनरात मर्मत तथा पुनःस्थापनाको काम गरिरहेको छ।
प्रधानन्यायाधीश राउतले सर्वोच्च अदालतको पूर्ण बैठक बसेर थप धारणा सार्वजनिक गरिने जानकारी पनि दिए।
भदौ २४ गते जेन–जी आन्दोलनका क्रममा सर्वोच्च अदालत, जिल्ला अदालत काठमाडौं र उच्च अदालत तुलसीपुरमा आगजनी हुँदा भवनहरूमा व्यापक क्षति पुगेको थियो। सर्वोच्च अदालतको भवन पूर्ण रूपमा जलेपछि बन्दी प्रत्यक्षीकरणका मुद्दाहरू हाल पालमुनिबाट सुनुवाइ भइरहेको छ।
हाल सर्वोच्च अदालतसहित देशभरका अदालतहरूमा अत्यावश्यक सेवामात्र सञ्चालन भइरहेका छन्।
