काठमाडौं: जेन-जी आन्दोलनका क्रममा आगजनी भएको सर्वोच्च अदालतमा आजदेखि रिट निवेदन दर्ता सुरु हुने भएको छ।
सर्वोच्च अदालत प्रशासनका अनुसार मुलुकी देवानी कार्यविधि संहिता, २०७४ को दफा १५७ तथा मुलुकी फौजदारी कार्यविधि संहिता, २०७४ का दफा ७३, १३७ र १५५ अन्तर्गत पर्ने निवेदन दर्ता र सुनुवाइ आजदेखि सुरु हुनेछ।
यसअघि आइतबार बसेको फुलकोर्ट बैठकले असोज २८ गतेदेखि नयाँ मुद्दा दर्ता सुरु गर्ने निर्णय गरेको थियो। भदौ २४ गते जेनजी आन्दोलनका क्रममा सर्वोच्च अदालतमा आगजनी हुँदा धेरै मिसिल र कागजात नष्ट भएपछि नियमित सेवा प्रभावित भएको थियो।
त्यसपछि अत्यावश्यक मुद्दाहरूको सुनुवाइ टेन्ट टाँगेर हुँदै आएको थियो। अदालतले सूचनामार्फत म्याद, हदम्याद र तारेख नगुज्रने व्यवस्था यथावत् रहने जनाएको छ।
