काठमाडौँ: यस वर्षको असामान्य वर्षाका कारण देशभर धान उत्पादनमा करिब पाँच प्रतिशतले कमी आउने प्रक्षेपण गरिएको छ। कृषि तथा पशुपन्छी विकास मन्त्रालयले उपलब्ध तथ्याङ्क र क्षतिको प्रारम्भिक मूल्यांकनका आधारमा यस्तो अनुमान गरेको हो।
वर्षाका कारण कृषि तथा पशुपन्छी क्षेत्रमा करिब तीन अर्ब ५५ करोड रुपैयाँ बराबरको क्षति पुगेको मन्त्रालयका सूचना अधिकारी महानन्द जोशीले जानकारी दिनुभयो। गत वर्ष ५९ लाख ५५ हजार मेट्रिक टन धान उत्पादन भएकोमा यस वर्ष करिब तीन लाख मेट्रिक टन कम उत्पादन हुने अनुमान गरिएको छ।
जोशीका अनुसार जलवायु परिवर्तनका प्रभावले बाढी, वर्षा र भूक्षयलगायतका विपद्का कारण सबैभन्दा बढी असर कृषि क्षेत्रमा परेको छ। विगत केही वर्षयता धान उत्पादनमा निरन्तर वृद्धि हुँदै आएको भए पनि यस वर्ष लक्ष्यमा पुग्न कठिनाइ देखिएको मन्त्रालयले जनाएको छ।
धान पाक्ने समयमा निरन्तर वर्षा भएकाले किसानले समयमै धान काट्न र भित्र्याउन नसक्दा ठूलो क्षति बेहोर्नु परेको छ। धेरै ठाउँमा खेतमै राखिएको धान पानीले भिजेर कुहिएको छ, जसले कुल उत्पादनमा प्रत्यक्ष असर पारेको मन्त्रालयको निष्कर्ष छ।
मौसम पूर्वानुमान विभागले सम्भावित वर्षाको जानकारी समयमै दिएका कारण मन्त्रालयले किसानलाई सतर्कता अपनाउन र मौसम अनुकूल भएपछि मात्र धान काट्न सुझाव दिएको थियो। मन्त्रालयले मल, बीउ, प्रविधि र प्राविधिक सहयोगमार्फत किसानलाई सहजीकरण गर्दै आएको जनाएको छ।
