काठमाडौँ: गत भदौ २३ र २४ गतेको जेनजी आन्दोलनसम्बन्धी घटनाको छानबिन गर्न गठित जाँचबुझ आयोगले हालै सेवामुक्त भएका नेपाल प्रहरीका महानिरीक्षक (आइजीपी) चन्द्र कुबेर खापुङलाई स्थान हद लगाउने निर्णय गरेको छ।
आयोगका प्रवक्ता विज्ञानराज शर्माले आज जारी गरेको प्रेस विज्ञप्तिमा खापुङलाई घटनासम्बन्धी छानबिन र जाँचबुझका लागि आयोगमा उपस्थित हुनुपर्ने हुँदा तत्काल लागू हुनेगरी स्थान हद गरिएको उल्लेख गरिएको छ।
विज्ञप्तिमा भनिएको छ, “कुनै पनि समयमा यस आयोगमा उपस्थित हुनुपर्ने भएकाले आजैदेखि लागू हुने गरी निजको विदेश भ्रमणमा रोक लगाउने र आयोगको स्वीकृति बिना काठमाडौँ उपत्यका छाड्न नपाउने व्यवस्था गर्न सम्बन्धित निकायमा पत्राचार गर्न निर्णय गरिएको छ।”
आयोगले यसअघि पूर्व प्रधानमन्त्री तथा नेकपा (एमाले)का अध्यक्ष केपी शर्मा ओली, पूर्व गृहमन्त्री रमेश लेखकसहित पाँच जनालाई पनि स्थान हद लगाउने निर्णय गरिसकेको छ।
