काठमाडौँ: नेपाल प्रिमियर लिग (एनपीएल)को दोस्रो संस्करण सोमबारदेखि सुरु हुने भएको छ। यसपटक पहिलोपटक प्रतियोगिता फ्लड लाइटअन्तर्गत डे–नाइट ढंगले आयोजना हुने क्यानले जनाएको छ। पहिलो संस्करण सफल रहेकाले दोस्रो संस्करणलाई अझ आकर्षक बनाउने लक्ष्यसहित डे–नाइट खेलको व्यवस्था गरिएको हो।
दोस्रो संस्करणको पुरस्कार राशि भने पहिलो संस्करणकै कायम राखिएको छ। पहिलो संस्करणमा जनकपुर बोल्ट्सले १ करोड १० लाख राशीसहित उपाधि जितेको थियो। उपविजेता सुदूरपश्चिम रोयल्सले ५१ लाख, तेस्रो स्थानमा रहेको कर्णाली याक्सले २५ लाख र चौथो भएको चितवन राइनोजले १५ लाख प्राप्त गरेको थियो।
एनपीएलमा ८ फ्रेन्चाइज टोली सहभागी छन्। सबै टोलीले विदेशी खेलाडी अनुबन्ध गरी तयारी गरिरहेका छन्। केही विदेशी खेलाडी नेपाल आइपुगेका छन् भने अन्य केही आउने क्रममा छन्।
एनपीएलको उद्घाटन खेल मंसिर १ गते सोमबार अपराह्न ४ बजेबाट सुरू हुनेछ। उद्घाटन खेलमा साविक विजेता जनकपुर बोल्ट्स र काठमाडौं गोर्खाज आमनेसामने हुनेछन्।
