काठमाडौँ: विभिन्न युवा संस्थाहरूको आयोजनामा १३औँ राष्ट्रिय पोशाक तथा टोपी दिवस आज देशभर विविध कार्यक्रमका साथ मनाइँदै छ।
‘नेपाली टोपीः हाम्रो पहिचान’ भन्ने नारासहित पछिल्ला १३ वर्षदेखि निरन्तर रूपमा यो दिवस मनाइँदै आएको हो। नेपाली पहिचानका प्रतीकका रूपमा रहेका दौरा–सुरुवाल, टोपी र गुन्यु–चोलीलाई विशेष गरी युवापुस्तामाझ प्रवर्द्धन गर्ने उद्देश्यले २०७० सालदेखि राष्ट्रिय पोशाक तथा टोपी दिवसको अभियान सुरु गरिएको हो।
दिवसको अवसरमा धेरैले राष्ट्रिय पोशाकमा सजिएको आफ्ना तस्बिर सामाजिक सञ्जालमार्फत सार्वजनिक गर्दै सहभागिता जनाइरहेका छन्। विगतमा औपचारिक रूपमा राष्ट्रिय पोशाक दिवस मनाउने प्रचलन हटाइएपछि पनि युवाहरूको स्वस्फूर्त पहलमा यो अभियान निरन्तर रूपमा अघि बढ्दै आएको छ।
