काठमाडौँ: गृहमन्त्री ओमप्रकाश अर्यालले समाजमा शान्ति, सद्भाव र अमनचयन कायम राख्न सरकार र नागरिक समाजबीच सहकार्य अनिवार्य रहेको बताएका छन्।
गृह मन्त्रालयमा आज नागरिक समाजका प्रतिनिधिसँग भएको छलफलमा गृहमन्त्री अर्यालले सामाजिक सञ्जालमार्फत फैलाइने धार्मिक विद्वेष, भ्रामक समाचार तथा सूचनाप्रति सबै सचेत रहन आग्रह गर्दै सामाजिक तथा धार्मिक सहिष्णुता संरक्षण गर्न नागरिक समाजको सक्रिय भूमिका आवश्यक रहेको उल्लेख गरे।
छलफलका क्रममा नागरिक समाजका अगुवाहरूले हाल सामाजिक सञ्जालका माध्यमबाट फैलिन खोजिरहेका धार्मिक अतिवादी विचार र गतिविधि चुनौतीपूर्ण बन्दै गएको भन्दै त्यसलाई नियन्त्रण गर्न साझा प्रयास आवश्यक रहेको धारणा राखेका थिए। गृहमन्त्री अर्यालले यस्ता गतिविधि निरुत्साहित गर्दै समाजमा शान्ति र सद्भाव कायम राख्न नागरिक समाजको भूमिका अत्यन्त महत्वपूर्ण रहेको बताए।
आपसी सद्भाव बिगार्ने तथा एक–अर्काको धार्मिक आस्थामा आँच पुर्याउने कुनै पनि गतिविधि स्वीकार्य नहुने उल्लेख गर्दै गृहमन्त्री अर्यालले त्यस्ता कार्य नियन्त्रणका लागि सरकार र नागरिक समाजले हातेमालो गर्दै अघि बढ्नुपर्नेमा जोड दिएका थिए।
