काठमाडौं: नेपाली कांग्रेसका महामन्त्री गगन थापाले सानेपास्थित पार्टी कार्यालय बाहिर नेता विमलेन्द्र निधिमाथि हिजो भएको व्यवहार आपत्तिजनक र गलत भएको बताएका छन्।
सामाजिक सञ्जालमार्फत आफ्नो धारणा सार्वजनिक गर्दै महामन्त्री थापाले विधि र प्रक्रियाभन्दा बाहिर जाने कुनै विकल्प नरहेको स्पष्ट पारे। उनले घटनाका सन्दर्भमा पार्टीका अर्का महामन्त्री विश्वप्रकाश शर्माले सार्वजनिक रूपमा व्यक्त गरेको धारणासँग आफू सहमत रहेको उल्लेख गरेका छन्।
असल प्रजातन्त्रवादीले सत्यको अनेकतामा विश्वास गर्ने र फरक मत राख्ने व्यक्तिको सम्मान गर्नुपर्ने उल्लेख गर्दै थापाले फरक विचारका कारण कुनै व्यक्तिमाथि दुर्व्यवहार हुनु झनै निन्दनीय हुने बताए। कांग्रेस परिवर्तन चाहने पार्टी भए पनि परिवर्तनका लागि विधि, विधान र प्रक्रिया नै एकमात्र मार्ग हुने उनले स्पष्ट पारे।
महामन्त्री थापाले पार्टीभित्र देखिने असहमतिका विषयहरू पनि स्थापित प्रक्रियामार्फत समाधान गर्नुपर्नेमा जोड दिँदै समग्र नेपाली कांग्रेसका शुभेच्छुकहरूलाई प्रक्रियामै विश्वास गर्न आग्रह गरेका छन्।
