काठमाडौँ: नेपाल सरकारले गत भदौ २३ र २४ गते भएका प्रदर्शनका क्रममा भएको भौतिक तथा मानवीय क्षतिको यथार्थ छानबिनका लागि गठन गरिएको जाँचबुझ आयोगको म्याद २० दिन थप गर्ने निर्णय गरेको छ।
प्रधानमन्त्री तथा मन्त्रिपरिषद्को कार्यालय, सिंहदरबारमा आज बसेको मन्त्रिपरिषद् बैठकले आयोगको अवधि थप्ने निर्णय गरेको गृहमन्त्री ओमप्रकाश अर्यालले जानकारी दिए।
यसअघि गत असोज ५ गतेको मन्त्रिपरिषद् बैठकले पूर्व न्यायाधीश गौरीबहादुर कार्कीको अध्यक्षतामा नेपाल प्रहरीका पूर्व अतिरिक्त प्रहरी महानिरीक्षक (एआइजी) विज्ञानराज शर्मा र कानुनविद् विश्वेश्वरप्रसाद भण्डारी सदस्य रहेको तीन सदस्यीय आयोग गठन गरेको थियो।
आयोगलाई सुरुमा तीन महिनाको समय दिइएको थियो। तर प्रतिवेदन तयारीको काम पूरा हुन नसकेपछि गृह मन्त्रालयको प्रस्तावमा दोस्रो पटक म्याद थप गरिएको हो। आयोगका लागि यसअघि थपिएको समय आजै समाप्त हुँदै थियो।
त्यसैगरी बैठकले सिद्धार्थ राजमार्गको बुटवल–पोखरा खण्ड सुधार आयोजनाको तयारीका लागि एसियाली पूर्वाधार लगानी बैंकबाट दुई मिलियन अमेरिकी डलर बराबरको अनुदान सहायता स्वीकार गर्ने निर्णय पनि गरेको छ। साथै, नेपाल सरकारको प्रवक्ताको जिम्मेवारी गृहमन्त्री अर्याललाई तोकिएको जानकारी पनि उनले दिए।
बैठकका अन्य निर्णयहरू नियमित पत्रकार सम्मेलनमार्फत सार्वजनिक गरिने जनाइएको छ।
