रामेछाप: रामेछापको मन्थली नगरपालिका–६ भलुवाजोरस्थित त्रिवेणीमा भएको बस दुर्घटनामा ज्यान गुमाउनेको संख्या नौ पुगेको छ।
काठमाडौंबाट ओखलढुंगातर्फ जाँदै गरेको प्रदेश ०३–०१–००५ ख १९७५ नम्बरको अरनिको यातायातको यात्रुबहाक बस मंगलबार बिहान करिब ११ बजे सडकबाट खस्दै तामाकोशी नदीमा खसेको हो।
दुर्घटनापछि स्थानीयवासी, सुरक्षाकर्मी तथा उद्धार टोलीको सहयोगमा घाइतेहरूको उद्धार कार्य तीव्र रूपमा भइरहेको छ। जिल्ला प्रहरी कार्यालय रामेछापका प्रहरी निरीक्षक राजनप्रसाद तिम्सिनाका अनुसार हालसम्म तामाकोशीमा डुबेको बसबाट नौ जनाको शव निकालिएको छ।
प्रहरीका अनुसार १० जनाभन्दा बढी घाइतेलाई उद्धार गरी उपचारका लागि अस्पताल पठाइएको छ। नदीमा डुबेको बसबाट अन्य यात्रुको खोजी तथा उद्धार कार्य जारी रहेको छ।
दुर्घटनाको कारण खुल्न बाँकी रहेको छ भने घटनाबारे थप अनुसन्धान भइरहेको प्रहरीले जनाएको छ।
