काठमाडौँ: सरकारले वैदेशिक रोजगारीका लागि श्रम स्वीकृति प्रक्रियामा सुधार गर्दै टोकन प्रणाली हटाएको छ। अब आवेदन दिएको दिनमै श्रम स्वीकृति प्रदान गरिने निर्णय गरिएको छ।
यसअघि सेवाग्राहीले टोकन लिएर तोकिएको मितिमा मात्र स्वीकृति पाउने व्यवस्था थियो। आइतबार श्रम, रोजगार तथा सामाजिक सुरक्षा मन्त्री दीपककुमार साहको उपस्थितिमा बसेको बैठकले प्रक्रिया सहज बनाउने निर्णय गरेको मन्त्रालयले जनाएको छ।
बैठकले पूर्वप्रस्थान अभिमुखीकरण तालिमलाई डिजिटल माध्यममार्फत उपलब्ध गराउने तथा पूर्ण रूपमा अनलाइन प्रणालीमा आधारित बनाउने निर्णय पनि गरेको छ। साथै, योगदानमा आधारित सामाजिक सुरक्षा कोषमा सबै श्रमिकलाई आवद्ध गराउने अभियान सञ्चालन गर्ने र न्यूनतम ज्यालाको प्रभावकारी कार्यान्वयन सुनिश्चित गर्ने योजना अघि सारिएको छ।
श्रमाधान योजनालाई थप प्रभावकारी बनाउँदै श्रमाधान कल सेन्टरलाई व्यवस्थित गर्ने, औद्योगिक प्रतिष्ठानहरूमा जोखिम मूल्याङ्कन गरी व्यवसायजन्य स्वास्थ्य तथा सुरक्षा प्रवर्द्धन गर्ने, उत्पादन र उद्यमशीलता बढाउँदै आन्तरिक रोजगारी सिर्जना गर्ने तथा थप पाँच मुलुकसँग द्विपक्षीय श्रम सम्झौता विस्तार गर्ने निर्णय पनि बैठकले गरेको छ।
मन्त्रिपरिषद्को चैत १३ गते स्वीकृत शासकीय सुधारसम्बन्धी एक सय कार्यसूचीमाथि समेत छलफल भएको मन्त्रालयले जनाएको छ। श्रम क्षेत्रलाई व्यवस्थित, मर्यादित र सुरक्षित बनाउने तथा श्रमिकको हकहित संरक्षण गर्ने उद्देश्यसहित ती कार्यसूची कार्यान्वयनका लागि मन्त्री साहले मातहतका निकायलाई निर्देशन दिए छन्।
त्यसैगरी, वैदेशिक रोजगारीमा रहेका नेपाली श्रमिकको सुरक्षा, न्यूनतम ज्याला, कार्यस्थलको अवस्था र स्वास्थ्य सुरक्षाबारे अध्ययन गरी न्यूनतम मापदण्ड तय गर्ने विषयमा पनि छलफल भएको छ। रोजगार प्रवर्द्धनका लागि सीप विकास तालिम सञ्चालन गर्ने र निजी क्षेत्रसँग सहकार्यमा सबै प्रदेशमा सीप मेला आयोजना गर्ने तयारीसमेत अघि बढाइएको छ।
मन्त्रालयले सेवा प्रवाहलाई सेवाग्राहीमैत्री बनाउने र वैदेशिक रोजगारीका नाममा हुने ठगी नियन्त्रण गर्न प्रभावकारी कदम चाल्ने योजना पनि सार्वजनिक गरेको छ।
