काठमाडौं: सरकारले अनलाइन मिडिया तथा सामाजिक सञ्जालमार्फत आधारहीन, मिथ्या र भ्रामक सूचना प्रसारण नगर्न आग्रह गर्दै त्यस्ता गतिविधिमा संलग्न हुनेलाई कानुनी कारबाही गरिने चेतावनी दिएको छ।
सञ्चार तथा सूचना प्रविधि मन्त्रालय ले विज्ञप्ति जारी गर्दै कपोलकल्पित समाचार वा अपुष्ट सूचना फैलाउने व्यक्ति तथा संस्थामाथि विद्युतीय कारोबार ऐन तथा अन्य प्रचलित कानुनअनुसार कारबाही गरिने जनाएको हो।
मन्त्रालयका अनुसार पछिल्लो समय विभिन्न सञ्चारमाध्यम र सामाजिक सञ्जालमा आधिकारिक पुष्टि नभएका सूचना तथा सामग्री व्यापक रूपमा फैलाइँदा आम नागरिकमा भ्रम सिर्जना भएको, समाजमा नकारात्मक मनोविज्ञान बढेको तथा सामाजिक सद्भावमा समेत असर पुगेको छ।
मन्त्रालयले सबै सञ्चारमाध्यम, सूचना प्रदायक संस्था तथा व्यक्तिलाई आधिकारिक निकायबाट पुष्टि नभएका समाचार वा सूचना हचुवाका भरमा प्रकाशन तथा प्रसारण नगर्न सचेत गराएको छ। साथै, आधारहीन र भ्रामक सामग्री प्रकाशन वा प्रसारण गरेको पाइएमा सम्बन्धित व्यक्ति वा संस्थाको पहिचान गरी कडा कानुनी कारबाही गरिने चेतावनी दिइएको छ।
त्यसैगरी, मन्त्रालयले आम नागरिकलाई पनि भ्रामक सूचना फैलाउन सहयोग पुग्ने कुनै पनि गतिविधिमा संलग्न नहुन आग्रह गरेको छ। यस्ता सूचना वा समाचारबारे जानकारी वा गुनासो भए मन्त्रालयको आधिकारिक वेबसाइटमा रहेको ‘सामाजिक सञ्जाल गुनासो दर्ता’ पोर्टलमार्फत जानकारी उपलब्ध गराउन अनुरोध गरिएको छ।
