पोर्चुगल: नेपाल पत्रकार महासङ्घकी अध्यक्ष निर्मला शर्माले सञ्चारमाध्यम बलियो भए मात्रै लोकतन्त्र सुदृढ हुने बताएकी छन् ।
नेपाल पत्रकार महासङ्घ युरोप शाखाले शनिबार लिस्बनमा आयोजना गरेको भेटघाट तथा अन्तरक्रिया कार्यक्रममा बोल्दै अध्यक्ष शर्माले स्वतन्त्र र जिम्मेवार प्रेस लोकतन्त्रको आधार भएको धारणा व्यक्त गरिन् ।
उनले सरकारले मिडियामाथि अङ्कुश लगाउन नहुने उल्लेख गर्दै प्रेस पूर्ण स्वतन्त्र हुनुपर्नेमा जोड दिइन् । कृत्रिम बुद्धिमत्ताको बढ्दो प्रभावसँगै पत्रकारिता क्षेत्रमा नयाँ चुनौती थपिएको बताउँदै सामाजिक सञ्जालमार्फत ‘कन्टेन्ट’का नाममा भ्रम फैलाउने प्रवृत्तिले पत्रकारिताको विश्वसनीयतामा असर परेको उनको भनाइ थियो ।
अध्यक्ष शर्माले सामाजिक सञ्जाललाई नियन्त्रण होइन, नियमन गर्नुपर्ने आवश्यकता औँल्याउँदै सत्यतथ्य परीक्षण गरेर मात्रै समाचार सम्प्रेषण गर्नुपर्नेमा जोड दिइन् । पत्रकार र सञ्चारमाध्यम दुवै उत्तरदायी र जिम्मेवार हुनुपर्ने उनको भनाइ थियो ।
उनले प्रवासी नेपाली समुदायका गतिविधि र समस्यासम्बन्धी सूचना तथा समाचार प्रवाह गरी पत्रकारितामार्फत समाजमा योगदान गर्न युरोपमा क्रियाशील नेपाली पत्रकारलाई आग्रह समेत गरिन् ।
कार्यक्रममा सहभागी पत्रकारहरूले युरोपमा नेपाली पत्रकारिताको अवस्था, चुनौती र अवसरबारे धारणा राख्दै प्रभावकारी पत्रकारिताका लागि केन्द्र र शाखाबीच समन्वय तथा संस्थागत सहकार्य आवश्यक रहेको बताएका थिए ।
