काठमाडौँ: सरकारले हाल देशमा करिब आठ महिनासम्म पुग्ने चिनी मौज्दात रहेको जनाएको छ। उद्योग, वाणिज्य तथा आपूर्ति मन्त्रालयले चिनीलगायत अत्यावश्यक उपभोग्य वस्तुको आपूर्ति सहज बनाउने र मूल्य स्थिर राख्ने काम निरन्तर भइरहेको स्पष्ट पारेको हो।
मन्त्रालयका प्रवक्ता नेत्रप्रसाद सुवेदीले उपभोक्ता तथा सरोकारवालालाई चिनीलगायत दैनिक उपभोग्य वस्तुको अनावश्यक सञ्चिति नगर्न आग्रह गरेका छन्। भारतले वैशाख ३० गतेदेखि चिनी निर्यातमा प्रतिबन्ध लगाएपछि उत्पन्न परिस्थितिप्रति सरकार सचेत रहेको पनि मन्त्रालयले जनाएको छ।
मन्त्रालयका अनुसार हाल सञ्चालनमा रहेका स्वदेशी उद्योगबाट उत्पादन भएको चिनी र आयात भइसकेको परिमाणलाई आधार मान्दा बजारको माग धान्न पर्याप्त मौज्दात छ। खाद्य व्यवस्था तथा व्यापार कम्पनी लिमिटेड, साल्ट ट्रेडिङ कर्पोरेसन लिमिटेड तथा निजी क्षेत्रसँग रहेको चिनीसमेत जोड्दा करिब आठ महिनाको माग पूरा गर्न सकिने उल्लेख गरिएको छ।
यसअघि नेपाल चिनी उत्पादक संघले पनि बजारमा चिनी अभाव नरहेको र मूल्य वृद्धि नभएको स्पष्ट पारेको थियो। संघका अनुसार उद्योगमा करिब एक लाख आठ हजार मेट्रिक टन चिनी मौज्दात छ भने बजारमा थप करिब २० हजार मेट्रिक टन चिनी उपलब्ध छ।
मन्त्रालयले चिनीको मूल्य नियन्त्रण तथा कृत्रिम अभाव रोक्न बजार अनुगमनलाई थप प्रभावकारी बनाइने जनाएको छ। साथै दीर्घकालीन रूपमा चिनीमा आत्मनिर्भर बन्न उत्पादनको प्रतिस्पर्धात्मक क्षमता वृद्धि गर्ने योजना कार्यान्वयन भइरहेको पनि उल्लेख गरिएको छ।
उखु उत्पादन वृद्धि गर्न कृषि मन्त्रालयले उन्नत जातको उखु प्रवर्द्धन, आधुनिक प्रविधिको प्रयोग तथा किसानलाई आवश्यक सहजीकरण गर्ने कार्यक्रम अघि बढाएको छ।
