काठमाडौँ
सरकारले समस्याग्रस्त सहकारीका साना बचतकर्ताको निक्षेप फिर्तालाई प्राथमिकतामा राखेको जनाएको छ। साना रकम बचत गरेका अधिकांश बचतकर्ता समस्यामा परेकाले उनीहरूको रकम फिर्तालाई पहिलो प्राथमिकतामा राखिएको हो ।
सरकारले पाँच लाख रुपैयाँभन्दा कम बचत गर्नेहरूलाई साना बचतकर्ता र पाँच लाखभन्दा बढी रकम बचत गर्नेहरूलाई ठूला बचतकर्ताका रूपमा वर्गीकरण गरेको छ ।
भूमि व्यवस्था, सहकारी तथा गरिबी निवारण मन्त्रालयका सहसचिव गणेशप्रसाद भट्टका अनुसार समस्याग्रस्त सहकारीमा १० हजार रुपैयाँभन्दा कम बचत भएका निक्षेपकर्तालाई रकम फिर्ता गर्ने काम सुरु भइसकेको छ । उहाँले यो प्रक्रिया निरन्तर अघि बढाइने र क्रमिक रूपमा ठूला बचतकर्ताको रकमसमेत फिर्ता गरिने जानकारी द्एि ।
मन्त्रालयका अनुसार बचतकर्ताको रकम फिर्ताका लागि समस्याग्रस्त सहकारीहरूको ऋण असुली प्रक्रिया पनि अगाडि बढाइएको छ । हाल करिब ७६ हजार बचतकर्ताको झन्डै ४६ अर्ब रुपैयाँ बराबरको रकम समस्यामा परेको बताइएको छ।
सहकारी पीडितको बचत फिर्ता गर्न चक्रीय कोष सञ्चालनसम्बन्धी कार्यविधि तयार पारिएको मन्त्रालयले जनाएको छ । आवश्यक स्रोत व्यवस्थापनका लागि अर्थ मन्त्रालयसँग आग्रह गरिएको पनि मन्त्रालयले उल्लेख गरेको छ ।
यसैबीच, मन्त्रालयले सोमबारदेखि सहकारी व्यवस्थापन समितिमार्फत ३७८ जना साना बचतकर्ताको रकम फिर्ता गर्ने प्रक्रिया सुरु गरेको छ । जसअनुसार कान्तिपुर सहकारीका २१५, शिवशिखर बहुउद्देश्यीय सहकारीका १५६ तथा पशुपति सहकारीका सात जना बचतकर्ताको निक्षेप फिर्ता गरिएको मन्त्रालयले जनाएको छ ।
बैङ्क खाताको प्रमाणीकरण (भेरिफाइ) भएका बचतकर्ताको रकम फिर्ता गरिएको मन्त्रालयको भनाइ छ।
