रिलायबल नेपाल लाइफको नवौँ स्थापना दिवसमा मन्थली बजार सरसफाइ तथा डस्विन वितरण

रामेछाप, भदौ १५ । रिलायबल नेपाल लाइफ इन्स्योरेन्स कम्पनी लिमिटेडको नवौँ स्थापना दिवसको अवसरमा मन्थली बजारमा सरसफाइ कार्यक्रम तथा डस्विन वितरण गरिएको छ।
रामेछाप उद्योग वाणिज्य संघको आयोजनामा भएको कार्यक्रममा मन्थली बजार क्षेत्रलाई स्वच्छ, सफा र व्यवस्थित बनाउने उद्देश्यले बजारका विभिन्न स्थानमा ४० थान डस्विन वितरण गरेको रामेछाप उधोग वाणिज्य संघका अध्यक्ष प्रकाश कुमार श्रेष्ठले जानकारी गराएका हुन।
सरसफाइ कार्यक्रममा उद्योगी व्यवसायी, नागरिक समाजका अगुवा, स्थानीयवासी, सुरक्षाकर्मी तथा पत्रकारलगायतको सहभागिता रहेको थियो। सहभागीहरूले बजार क्षेत्रमा उत्पादन हुने फोहोरको उचित व्यवस्थापनका लागि डस्विनको प्रयोगलाई प्रभावकारी बनाउनुपर्नेमा जोड दिएका थिए।
सार्वजनिक स्थलमा जथाभावी फोहोर फाल्ने प्रवृत्तिलाई निरुत्साहित गर्दै स्वच्छ र व्यवस्थित मन्थली बजार निर्माणका लागि स्थानीय तह, व्यवसायी, नागरिक तथा सम्बन्धित सबै पक्षबीच सहकार्य आवश्यक रहेको अध्यक्ष श्रेष्ठको समेत उल्लेख गरे।
कार्यक्रममा मन्थली नगरपालिकाका नगर प्रमुख लव श्रेष्ठ, मन्थली नगरपालिका–१ का वडाध्यक्ष होमप्रसाद पौडेल, रिलायबल नेपाल लाइफ इन्स्योरेन्स रामेछाप शाखाका प्रमुख शान्ता श्रेष्ठ, पत्रकार, सुरक्षाकर्मी, उद्योगी व्यवसायी, नागरिक समाजका अगुवा, टोल सुधार समितिका अध्यक्ष लगाएतको उपस्थिति रहेको थियो।
रिलायबल नेपाल लाइफ इन्स्योरेन्सको स्थापना दिवसलाई सामाजिक उत्तरदायित्वसँग जोडेर आयोजना गरिएको कार्यक्रमले मन्थली बजारको सरसफाइ तथा फोहोर व्यवस्थापनमा सकारात्मक सन्देश दिएको आयोजकले जनाएको छ।