रामेछाप जिल्ला प्रहरी कार्यालयमा नागरिक पुगेर गुनासा राख्ने परम्परा बदल्दै रामेछाप प्रहरी आफैँ गाउँगाउँ पुग्न थालेको छन। नागरिकका समस्या, सुझाव र अपेक्षा सुन्न तथा प्रहरीले गरिरहेका कामबारे जानकारी गराउने उद्देश्यले नागरिक सुनुवाइ कार्यक्रम सुरु गरिएको हो।
समुदाय/प्रहरी साझेदारी कार्यक्रमअन्तर्गत खाँडादेवी गाउँपालिका–५, गोगनपानीमा पनि नागरिक सुनुवाइ सम्पन्न भएको छ। कार्यक्रममा डीएसपी सन्तुलालप्रसाद जैसवारले गत आर्थिक वर्षमा प्रहरीले गरेका काम र उपलब्धिबारे जानकारी गराउँदै प्रहरीसँग सम्बन्धित समस्या तथा सुझाव खुलेर राख्न आग्रह गरे।
स्थानीयले भने बालविवाह नियन्त्रण, प्राकृतिक स्रोतसाधनको चोरी निकासी तथा नदीमा अवैध माछा मार्ने कार्य नियन्त्रण गर्न प्रहरीको प्रभावकारी निगरानी र कारबाहीको माग गरेका छन्।
गाउँपालिका उपाध्यक्ष तथा कार्यक्रमको प्रमुख अतिथि रमा घिसिङले यस्ता कार्यक्रमले प्रहरी र नागरिकबीचको विश्वास र सम्बन्ध थप बलियो बनाउने बताइन्।
