काठमाडौं । नेपाली कांग्रेसका महामन्त्री गगन थापाले आफू मौन बस्दैमा पार्टीको समस्या समाधान नहुने बताएका छन् । पार्टी केन्द्रीय कार्यालय सानेपामा जारी केन्द्रीय समितिको बैठकमा उठेका प्रश्नको सोमबार जवाफ दिँदै महामन्त्री थापाले पार्टीलाई दुर्घटनातिर जान नदिन सबै सम्हालिनुपर्ने बताएका हुन् ।
उनले भने, ‘बाहिर जेजे कुरा आएका छन् त्यो सबै प्रायोजित छन् । पार्टीगतरूपमा एउटा समस्या छ । महामन्त्री अलि बढी बोल्छ । त्यसले बोल्न बन्द गरेर मौन ब्रत राख्यो भने पार्टीको सबै समस्या समाधान हुन्छ । सभापतिज्यू ! मलाई के लाग्छ भने यसले हामीलाई दुर्घटनातिर लान्छ । यो अहिलेको समय न आत्मनिन्दा गर्ने बेला हो । यो बेलामा हामी सम्हालिनुपर्छ ।’
महामन्त्री थापाले सबै पार्टीमा अहिलेसम्म नेतृत्व हस्तान्तरणलाई सहज रुपमा हुने व्यवस्था नभएकाले आफूले संसदीय दलको नेता परिवर्तन गर्ने कुरा उठाएको बताए ।
उनले भने, ‘हाम्रोमा मात्र होइन कुनै दलमा सम्मानजनक बहिर्गमनको व्यवस्था छैन । पार्टीहरु जमेको पोखरी जस्तो भए । जसका कारण सबै दल संकटमा परेका छन् । तीस वर्षदेखि केही नेता म्यूजिकल चेयरमा बसेको जस्तो छ । सभापतिज्यूप्रति मेरो पितातूल्य सम्मान छ । तर यसलाई बदल्नुपर्छ भन्ने मेरो विचार हो । यसमा मेरो बहस चलिरहन्छ । नेता बदल्ने प्रयास चलिरहन्छ । पार्टीको विधान र संविधानले दिन्छ । कर्म गर्ने हो, सांसदको मत पाउन गाह्रो छ । लाखौं मतदाताकोमा भोटिड गरे जस्तो होइन नि । सभापतिजीले एकदुई महिनापछि कोही अगाडि आओ भन्नुहुन्छ कि ? मै हुनुपर्छ भन्ने होइन, मैले साथ दिने हो । त्यतिबेला कोही अघि सरेनन् भने म अघि सर्ने हो । बदल्न चाहिँ लागिरहन्छु ।’
महामन्त्री थापाले गठबन्धन सरकारका कतिपय निर्णय समाचार आएपछि मात्र थाहा पाउने गरेको भन्दै निर्णय अघि पार्टीमा छलफल हुनुपर्ने बताएका छन् ।
उनले भने, ‘पार्टी गतिविधिकाबारेमा बाहिर किन राखेको भन्नुहुन्छ । बहुमत र अल्पमतले मात्र पार्टी चल्दैन । नेतृत्व परिवर्तन गर्ने कुरा हुन्छ, विवाद छलफल हुनु स्वभाविक हो ।मोबाइल खोलेर हेर्छु । फलानो मन्त्री भयो, फलानाको कैद मिनाहा भयो भनेर समाचार आउँछ । समाचार मात्र सुन्नु परेको छ । यी बहुसंख्यक कुरा मैले समाचार पढेर थाहा पाउँछु । यसबारे पार्टीमा किन छलफल हुँदैन त ? के कारणले छुट पाए र कुनै व्यक्ति कांग्रेस भएका कारण छुट, कसैलाई भारी बोक्ने हुनु हुँदैन ।’ महामन्त्री थापाले बालकृष्ण खाँणप्रति सकेत गर्दै फौजदारी अभियोग लागेकालाई पार्टीले निलम्बन गर्नुपर्ने बताए । उनले यो कुरा विधानमा पनि स्पष्ट रहेको बताए । उनले भने, ‘कुनै पनि व्यक्तिमाथि फौजदारी अभियोग लाग्छ भने पार्टीसँग अलग राख्नुपर्छ, त्यस्तो अवस्था हुन्न भने निलम्बन गर्नुपर्छ ।’
उनले विधानअनुसार समयबद्ध काम गर्न वार्षिक कार्यतालिका केन्द्रीय समितिमा पेश गरेको भन्दै आफूले एनजिओमा काम नगरेको बताए । केन्द्रीय सदस्य आरजु राणाले यसलाई एनजिओको विसलिष्ट भनेको तर्फ इंगित गर्दै उनले भने, ‘केही विद्वान साथीहरूले यो एनजिओको विसलिष्टजस्तो छ पनि भन्नुभयो। एनजीओमा धेरै काम नगरेको हुनाले मलाई यसबारे अनुभव त छैन।’
