हेटौंडा /संघीय लोकतान्त्रिक गणतन्त्रको बिकल्प नभएको संबिधान सभा सदस्य एवम् नेकपा माओबादी केन्द्रका केन्द्रीय सदस्य प्रल्हाद लामिछानेले बताएका छन् ।
१७ औं गणतन्त्र दिवसको उपलक्ष्यमा वाईसीएल नेपाल र अखिल क्रान्तिकारी हेटौंडा उपमहानगर कमिटीले संयुक्तरूपमा हेटौंडाको बुद्ध चोकमा आयोजना गरेको दीप प्रज्वलन कार्यक्रमलाई संबोधन गर्ने क्रममा कार्यक्रमका प्रमुख अतिथि समेत रहेका लामिछानेले १० बर्षे जनयुद्ध र जनयुद्धको जगमा उपलब्धिको रुपमा गणतन्त्र आएको र गणतन्त्रको संस्थागत विकास गर्नु सबैको दायित्व भएको बताए ।
अखिल क्रान्तिकारी हेटौंडा उपमहानगर कमिटी अध्यक्ष बिजन लटौलाको अध्यक्षतामा भएको कार्यक्रममा वाईसीएल नेपाल हेटौंडा उपमहानगर कमिटी अध्यक्ष मदन उप्रेतीले स्वागत गरेका थिए ।
अखिल क्रान्तिकारी मकवानपुर कोषाध्यक्ष बुद्धराज अर्यालले सांचालन गरेको कार्यक्रममा नेकपा माओबादी केन्द्रका बागमती प्रदेश कमिटी उपाध्यक्ष प्रेमबहादुर पुलामी, जिल्ला समन्वय समिति संयोजक भीम पाख्रीन, सचिव वीर बहादुर घलान’ज्वाला’, हेटौडा उपमहानगर कमिटी अध्यक्ष तिर्थ बहादुर थापा मगर, प्रेस सेन्टर नेपालका केन्द्रीय सदस्य एवम् मकवानपुर इन्चार्ज ध्रुबराज ढकाल, अखिल क्रान्तिकारीका केन्द्रीय सदस्य राजकुमार मोक्तान, प्रदेश कमिटी सचिब रामकृष्ण सिवाकोटी, मकवानपुर अध्यक्ष श्रवण बर्तौला, स्वतन्त्र विद्यार्थी युनियन मकवानपुर बहुमुखी क्याम्पस सभापति छोइसाङ लामा लगायत युवा, विद्यार्थीहरुको सहभागिता रहेको थियो ।
गणतन्त्रको स्थापना नै समाजवादको आधार हो : गौतम
नेपाल कम्युनिस्ट पार्टी (माओवादी केन्द्र)का केन्द्रीय सदस्य एवम् मकवानपुर इन्चार्ज विजय गौतमले गणतन्त्रको स्थापना नै समाजवादको आधार भएको बताएका छन् ।
नेपाल कम्युनिस्ट पार्टी (माओवादी केन्द्र) राक्सिराङ्ग गाउँ कमिटीको बिस्तारित बैठक एवम् १७ औं गणतन्त्र दिवसको अबसरमा शुभकामना अदानप्रदान कार्यक्रमलाई संबोधन गर्दै प्रमुख अतिथि गौतमले गणतन्त्रको रक्षा र विकासको लागि क्रान्तिकारी शक्तिहरु एकढिक्का भएर अगाडि बढ्नुको बिकल्प नभएको बताए ।
पार्टी गाउँकमिटी अध्यक्ष हस्त बहादुर मोक्तानको अध्यक्षतामा भएको कार्यक्रममा माओवादी केन्द्र जिल्ला समन्वय समिति संयोजक भीम पाख्रीन, सचिव वीर बहादुर घलान’ज्वाला’, राक्सिराङ्ग गाउँपालिका ईन्चार्ज शुभरत्न गोले, बागमति प्रदेश कमिटी सचिवालय सदस्य बनस्तम थिङ्ग लगायतको आतिथ्यता रहेको थियो ।
बिस्तारित बैठकले पार्टी सदस्यता बितरण र नवीकरण गर्ने, नियमित गतिविधिहरु संचालन गर्ने निर्णय भएको गाउँकमिटी अध्यक्ष मोक्तानले बताए ।
