एसइई नतिजा सार्वजनिक, साढे २ लाख फेल

राष्ट्रिय परीक्षा बोर्डले २०८० सालको माध्यमिक शिक्षा परीक्षा (एसइई) को नतिजा सार्वजनिक गरेको छ । आज बिहान बसेको बोर्ड बैठकको निर्णयसँगै नतिजा सार्वजनिक भइसकेको बोर्डका अध्यक्ष महाश्रम शर्माले जानकारी दिनुभयो । आज सार्वजनिक भएको नतिजा अनुसार परीक्षामा सहभागी भएका कुल विद्यार्थीमध्ये ४७.८६ प्रतिशत विद्यार्थीमात्रै उत्तीर्ण भएका छन् । भने ५२ प्रतिशत अर्थात् २ लाख ४२ हजार ९२ जना परिक्षार्थी फेल अर्थात उनीहरुले (एनजी) ल्याएका छन् । नतिजा अनुसार १८६ जनाले ४ जीपए ल्याएका छन् । परीक्षा बोर्डका अनुसार २२१ जनाको परीक्षा रद्द गरिएको छ । गत चैत १५ गतेदेखि शुरु भएको एसइईमा नियमिततर्फ ४ लाख ६७ हजार र ग्रेड वृद्धितर्फ २१ हजार परीक्षार्थी सहभागी थिए । एसइई नतिजा वेबसाइट,एसएमएस र आइभिआरबाट हेर्न सकिनेछ । आइभिआरका लागि नेपाल टेलिकमको ल्यान्डलाइन फोन,मोबाइलबाट १६०० डायल प्राप्त निर्देशनअनुसार गर्नुपर्ने बताएको छ । एसएमएसको लागि मोबाइलको म्यासेज बक्समा SEE टाइप गरी १६०० मा पठाउनुपर्ने राष्ट्रिय परीक्षा बोर्डले जनाएको छ ।
विद्यार्थीले २ विषयसम्म ग्रेड वृद्धि परीक्षा दिन पाउने छन् । जुन विषयमा एनजी भएको हो त्यही विषयमा मात्र परीक्षा दिए हुन्छ । दुई विषयभन्दा बढीमा एनजी आए अर्को वर्ष सम्बन्धित विषयको मात्र परीक्षा दिन पाइने व्यवस्था निर्देशिकामा गरिएको छ । यस्ता विद्यार्थीले तीन वर्षसम्म वार्षिक परीक्षामा सहभागी हुन पाउने बोर्डले जनाएको छ । ग्रेडिङमा परेका विद्यार्थी मात्रै माथिल्लो कक्षामा भर्ना र पठनपाठन गर्न योग्य ठहरिन्छन् ।