काठमाण्डाै/ नेपाली राष्ट्रिय महिला क्रिकेट टोली श्रीलङ्कामा चलिरहेको एशिया कप टी–२० क्रिकेट प्रतियोगिता खेलेर स्वदेश फर्किएकाे छ ।
नेपाली टोली आज दिउँसो काठमाण्डौ आइपुगेको हो । नेपाली टोलीलाई त्रिभुवन अन्तर्राष्ट्रिय विमानस्थलमा राष्ट्रिय खेलकुद परिषद् (राखेप) का कार्यवाहक सदस्य सचिव अञ्जन धमला र सदस्य प्रकाशकुमार कुसारीले स्वागत गर्नुभयो ।
प्रतियोगितामा नेपालले समूह चरणमा तीन खेल खेल्दा एकमा जीत, दुईमा हार बेहोर्दै प्रतियोगिताबाट बाहिरिएको थियो । नेपालले पहिलो खेलमा यूएईलाई ६ विकेटले हराउँदै ऐतिहासिक जीत हात पार्दा दोस्रो खेलमा पाकिस्तानसँग ९ विकेट र तेस्रो खेलमा भारतसँग ८२ रनले पराजित भएको थियो ।
स्वदेश फर्किएसँगै नेपाली टोलीका कप्तान इन्दु बर्माले एशिया कपजस्तो ठूला प्रतियोगिता खेल्न धेरै पक्षमा सुधार गर्नुपर्ने बताएकी छिन् । उनले भारत र पाकिस्तानजस्ता बलिया टोलीसँग खेल्न ब्याटिङ, बलिङ र फिल्डिङमा सुधार गर्नुपर्ने बताइन् । यी पक्षमा सुधार गरे भारत र पाकिस्तानलाई जित्न सकिने उनको भनाइ थियो ।
