काठमाण्डाै / राष्ट्रिय स्वतन्त्र पार्टी (रास्वपा) ले पार्टीको विधान परिमार्जन गर्न ११ सदस्यीय विधान संशोधन सुझाव कार्यदल गठन गरेको छ ।
पार्टी केन्द्रिय कार्यालय वनस्थलीमा आज बसेको बैठकले विधान परिमार्जन, संशोधन र सुझावका लागि कार्यवाहक महामन्त्री कविन्द्र बुर्लाकोटी संयोजक रहनेगरी कार्यदल बनाएको हो । कार्यदलमा सोबिता गौतम, गणेश कार्की, डा. तोसिमा कार्की, क्रान्तिशिखा धिताल, डा. नारायण घिमिरे, विजय जैरु, मेघ आले, कामिनी चौधरी, पुकार बम र शङ्कर श्रेष्ठ छन् ।
यस्तै राष्ट्रिय स्वतन्त्र पार्टीले कर्णाली प्रदेशमा विशेष अभियान सञ्चालन गर्ने निर्णय पनि गरेको छ ।
यस्तै बैठकले उपसभामुख इन्दिरा रानाले अमेरिकी दूतावासमा पठाएको भनिएको पत्र दूतावासमा दर्ता नभएकोले थप छानबिन आवश्यक नरहेको निष्कर्ष निकालेको छ । कांग्रेस र एमालेले संवैधानिक परिषद्मा बहुमत पुर्याउनकै लागि इन्दिरा रानाविरुद्ध हल्ला फैलाएको राष्ट्रिय स्वतन्त्र पार्टीले जनाएको छ ।
