हेटाैँडा । मकवानपुरको हेटौँडा-११, थानाभर्याङमा रहेको जिल्ला ट्राफिक प्रहरी कार्यालयले शुक्रबार आयोजना गरेको सार्वजनिक सवारीसाधन चलाक तथा सहचालकहरुको स्वास्थ्य परीक्षण कार्यक्रम आयोजना गरेको छ । १ सय ५२ जना सार्वजनिक सवारीसाधनका चालक तथा सहचालकहरुको स्वास्थ्य परीक्षण गरिएको छ ।
जसमा ३६ जनामा उच्च रक्तचाप, १२ जनामा न्यून रक्तचाप र १३ जनामा हाई सुगर देखिएको छ । यस्तै एक जनाको मोती बिन्दु देखिएको छ भने १२ जनामा दृष्टिदोष र ३ जना चालकको सुगरका कारण आँखाको पर्दामा रगत जमेको पाईएको ट्राफिक प्रहरी कार्यालय मकवानपुरका प्रमुख केशव अधिकारीले जानकारी दिनुभयो ।
सोही अवसरमा सार्वजनिक सवारीसाधनहरुका चालक तथा सहचालकहरुले लागुऔषध सेवन गरे /नगरेको समेत परिक्षण गरिएको थियोे । बागमती प्रदेश प्रहरी अस्पताल रातोमाटे, जिल्ला जनस्वास्थ्य कार्यालय मकवानपुर, हेटौँडा अस्पताल, सामुदायिक आँखा अस्पताल हेटौँडा, नारायणी यातायात व्यवसायी संघ तथा नारायणी यातायात प्रालिको मेडिकल टिमको सहयोगमा कार्यक्रम गरिएको हो । सवारी दुर्घटना तथा क्षती न्यूनिकरणको लागि सार्वजनिक ठूला तथा मझौला सवारीसाधनहरुलाई लक्षित गरी चालकहरुको स्वास्थ्य परिक्षण, आँखा जाँच तथा लागूऔषध चेकजाँच गरेका हुन् ।
