काठमाडौँ, २३ असार
प्रधानमन्त्री केपी शर्मा ओली र स्विट्जरल्यान्डका सङ्घीय विदेशमन्त्री इग्नाजिओ डानियल जिओभान्नी क्यासिसबीच आज बालुवाटारमा शिष्टाचार भेटवार्ता सम्पन्न भएको छ।
भेटका क्रममा दुई देशबीचको मित्रवत् सम्बन्धलाई अझ सुदृढ बनाउँदै विकासका विविध क्षेत्रमा सहकार्य विस्तार गर्ने विषयमा छलफल भएको थियो। विदेशमन्त्री क्यासिसले नेपालको विकास, सङ्घीयता सबलीकरण, सङ्क्रमणकालीन न्याय, जलवायु परिवर्तन र विपद् जोखिम व्यवस्थापनमा स्विट्जरल्यान्डको सहयोग निरन्तर जारी रहने प्रतिबद्धता व्यक्त गर्नुभयो।
प्रधानमन्त्री ओलीले नेपालमा लामो समयसम्मको हिंसात्मक र अस्थिर राजनीति पछाडि पार्दै अहिले दुई ठूला दलको सहकार्यमा स्थिर सरकार गठन भएको र सुशासन, विकास र लोकतन्त्रको सुदृढीकरणतर्फ देश अघि बढिरहेको बताउनुभयो। उहाँले नेपालको विकासमा स्विट्जरल्यान्डले पुर्याउँदै आएको निरन्तर सहयोगप्रति धन्यवाद ज्ञापन गर्नुभयो।
भेटमा नेपालका लागि स्विट्जरल्यान्डका राजदूत डा. डानियल मेउल्ली, परराष्ट्र मन्त्रालयका अधिकारीलगायतको उपस्थिति थियो।
