काठमाडौँ
गृहमन्त्री रमेश लेखकले प्रधानमन्त्री केपी शर्मा ओलीको हालैको स्पेन भ्रमणमा सरकारी प्रतिनिधिमण्डल बाहिरका केही व्यक्ति गएर नफर्किएको विषयमा छानबिन गर्न निर्देशन दिनुभएको छ।
सोमबार बिहान गृहसचिव गोकर्णमणि दुवाडी र प्रहरी महानिरीक्षक (आईजीपी) दीपक थापालाई गृहमन्त्री लेखकले उक्त घटनाबारे तत्काल निष्पक्ष अनुसन्धान थाल्न निर्देशन दिनुभएको हो।
छानबिनको जिम्मा प्रहरीको केन्द्रीय अनुसन्धान ब्युरो (सीआईबी) र मानव बेचबिखन अनुसन्धान ब्युरोलाई दिइएको छ। अनुसन्धानको दायरा प्रधानमन्त्रीको प्रतिनिधिमण्डलबाहेक अन्य व्यक्तिहरू कसरी टोलीमा समावेश भए, उनीहरूले भिसा कसरी पाए र कस्तो प्रक्रिया अवलम्बन गरियो भन्ने विषयमा केन्द्रित हुने गृहमन्त्रीको सचिवालयले जनाएको छ।
अनुसन्धानपछि दोषी ठहरिने व्यक्तिहरूलाई कानुनी दायरामा ल्याइने स्पष्ट गर्दै गृह मन्त्रालयले आवश्यक कानुनी कारबाही प्रक्रिया अघि बढाइने जानकारी दिएको छ।
